Newyddion | 7 Medi 2023
Mae Prifysgol Metropolitan Caerdydd wedi cyrraedd rhestr fer ar gyfer pedair Gwobr Times Higher Education (THE), sydd yn cydnabod gwaith nodedig ar draws arloesi yn y diwydiant bwyd, STEM, ymchwil, a chydraddoldeb ac amrywiaeth.
Dyma pedwar enwebiad Met Caerdydd:
- Cyfraniad Eithriadol at Gydraddoldeb, Amrywiaeth a Chynhwysiant –
Dysgu Proffesiynol Amrywiaeth a Gwrth-hiliol (DARPL)
- Menter Cyfnewid/Trosglwyddo Gwybodaeth y Flwyddyn –
Prosiect Helix, Canolfan Diwydiant Bwyd ZERO2FIVE (FIC)
- Athro Mwyaf Arloesol y Flwyddyn –
Dr Esyin Chew, Ysgol Dechnolegau Caerdydd
- Goruchwyliwr Ymchwil Eithriadol y Flwyddyn –
Dr Jenny Mercer, Chwaraeon a Gwyddorau Iechyd Caerdydd
Met Caerdydd sy’n hawlio nifer mwyaf o enwebiadau ymhlith prifysgolion y DU a Chymru.
Mae Gwobrau Times Higher Education yn dathlu llwyddiannau prifysgolion ledled y DU, ac yn anrhydeddu ymchwil sy’n arwain y byd ac unigolion rhagorol sy’n gwneud gwahaniaeth ym myd addysg uwch.
Wrth siarad am yr enwebiadau, dywedodd Llywydd ac Is-Ganghellor Prifysgol Metropolitan Caerdydd, yr Athro Cara Aitchison: “Mae ein lle ar y rhestr fer ar gyfer Gwobrau THE yn gydnabyddiaeth wych o’r gwaith eithriadol sy’n digwydd ar draws y Brifysgol. Rydym yn edrych ymlaen at y seremoni ym mis Rhagfyr ac yn gobeithio y bydd gwaith caled ein cydweithwyr yn cael ei anrhydeddu â buddugoliaeth.”
Yn 2021, cafodd Met Caerdydd ei henwi’n Brifysgol y Flwyddyn 2021 y DU ac Iwerddon, gwobr bwysicaf y THE, sy’n cydnabod twf, arallgyfeirio a gwelliant eithriadol y Brifysgol fel sefydliad blaengar sy’n cael ei yrru gan werthoedd, gyda phrofiad myfyrwyr a diwylliant staff rhagorol ac sy’n cynhyrchu ymchwil ac arloesi effeithiol.
