Gwyddor Gymhwysol Anafiadau

Er bod straen corfforol a meddyliol yn rhan annatod o hwyluso addasiadau cadarnhaol i hyfforddiant ar gyfer gwell perfformiad mewn chwaraeon, gall lefelau gormodol o straen fod yn niweidiol o ran cynyddu'r risg o anaf, a’r tebygrwydd y byddant yn digwydd.  Mae anaf a straen yn amlochrog eu natur  ̶  nodwedd sydd wedi rhwystro ein dealltwriaeth o fecanweithiau ac amlder  achosion o anafiadau. Mae'r ymchwil hon yn defnyddio dulliau amlddisgyblaethol a rhyngddisgyblaethol arloesol sy'n tynnu ar safbwyntiau o fyd seicoleg, biomecaneg a seicoffisioleg i archwilio’r rhyngweithio cymhleth rhwng ffactorau sy'n gysylltiedig â straen wrth ragfynegi anafiadau mewn chwaraeon a’u hamlder.

Themâu Allweddol: Rhyngweithiadau o ran straen mewn achosion o anafiadau i athletwyr; straen a pherfformiad mewn chwaraeon.

Mae canlyniadau anafiadau fel arfer yn gysylltiedig â ffactorau ffisiolegol ac anatomegol. Ond mae corff cynyddol o ymchwil empirig wedi awgrymu y gallai ffactorau seicolegol a seicogymdeithasol gyfrannu at, hwyluso ac atal gwella o anaf. Mae'r ymchwil hon yn archwilio'r ffactorau seicolegol amlochrog sy'n gysylltiedig ag ymatebion athletwyr i anaf, a gwella ohonyn nhw. Archwilir ffactorau fel cefnogaeth gymdeithasol athletwyr, effeithiolrwydd triniaeth a chadw ati, a hyder.

Themâu Allweddol: Ffactorau seicolegol a seicogymdeithasol; Cefnogaeth gymdeithasol ac emosiynol; Effeithlonrwydd gwella a chadw at driniaeth.

Mae datblygu strategaethau adsefydlu effeithiol yn sylfaenol wrth hwyluso dychwelyd at chwaraeon yn amserol a diogel. Mae'r ymchwil hon yn defnyddio safbwyntiau o fyd seicoleg, biomecaneg, ffisioleg a niwromecaneg i archwilio a llywio datblygiad y strategaethau hyn. O fewn cam cyntaf y gwaith o adsefydlu ar ôl anafiadau, archwilir llwytho mecanyddol yr aelodau isaf (biomecaneg), effeithlonrwydd symud (effeithiau ffisiolegol) a chanlyniadau perfformiad mewn ymateb i weithredu strategaethau ailhyfforddi sy'n rhoi pwyslais ar ddamcaniaethau canolbwyntio sylw a hunan-fodelu (seicolegol). Mae ymchwil arall yn defnyddio persbectif niwromecanyddol i archwilio rhyngweithiadau rhwng ystum a symud sy'n hwyluso’r gwaith o ddylunio profion gweithredol ac yn helpu i lywio datblygiad strategaethau dychwelyd i chwaraeon.

Themâu Allweddol: Ailhyfforddi rhedeg; Dysgu ysgogol ar gyfer adsefydlu; Anaf ACL a dychwelyd at chwaraeon.

Defnyddir safbwyntiau o fyd meddygaeth chwaraeon, biomecaneg, seicoleg, gwyddor data ac epidemioleg i lywio'r broses o drosglwyddo mewnwelediadau gwyddonol i'r rhyngwyneb rhwng perfformiad ac ymarferydd. Mae'r ymchwil hon yn hanfodol wrth ddarparu strategaethau meddygol sy'n seiliedig ar dystiolaeth, gan ganiatáu i broblemau anafiadau sy’n flaenoriaeth gael eu nodi ac i dueddiadau o ran anafiadau gael eu hasesu. Mae aelodau'r grŵp yn gweithio'n agos gyda Chyrff Llywodraethu Cenedlaethol mewn chwaraeon i ymgymryd â phrosiectau epidemioleg anafiadau ac i roi  cyngor pwrpasol ar atal a rheoli anafiadau.

Themâu Allweddol: Dadansoddiad ystadegol o batrymau anafiadau; Llwytho a risg anafiadau; Effeithiau yn y meddwl  a rhyngbersonol mewn perfformiad chwaraeon.