Gwaith Cymdeithasol - BSc (Anrh)

Blwyddyn: 'Rhagarweiniad a Sylfaen'
Ar y cam hwn, cewch eich asesu ar eich potensial i ddatblygu ymhellach. Cyn ymgymryd ag ymarfer uniongyrchol gyda defnyddwyr gwasanaeth mewn lleoliad ymarfer dysgu, rhaid i chi wneud 20 diwrnod o ymarfer dysgu pan fydd rhaid i chi ddangos eich bod yn meddu ar y sgiliau rhyngbersonol a’r gwerthoedd sydd eu hangen er mwyn bod yn addas a diogel i weithio gyda phobl ag anghenion gofal cymdeithasol a’u gofalwyr. Bydd ffocws blwyddyn gyntaf yr astudiaeth hefyd ar werthoedd craidd a sgiliau yn ogystal â phrosesau cymdeithasol, diwylliannol a sefydliadol ehangach sy’n fframio rôl a thasg gwaith cymdeithasol.

Blwyddyn Dau a Thri: 'Cymhwyso gwybodaeth, sgiliau a gwerthoedd mewn ymarfer gwaith cymdeithasol ac i ddatblygu a chadarnhau cymhwysedd mewn ymarfer gwaith cymdeithasol‘
Byddwch y treulio 180 o ddyddiau mewn lleoliadau dysgu ymarfer a asesir (80 diwrnod ym mlwyddyn 2 a 100 diwrnod ym mlwyddyn 3).

​Bydd hyn yn golygu lleiafswm o ddau leoliad ymarfer. Bydd hyn yn cynnig ystod o gyfleoedd dysgu i chi ddangos cymhwysedd o ran Safonau Galwedigaethol Cenedlaethol Gwaith Cymdeithasol (2011) a Chod Ymarfer Proffesiynol Gwaith Cymdeithasol (2017). Erbyn diwedd y ddau gyfnod dysgu drwy ymarfer hirach hyn, byddwch yn defnyddio gwybodaeth am waith cymdeithasol, sgiliau a gwerthoedd yn cynnwys canfyddiadau ymchwil yn eich ymarfer a bydd angen i chi arddangos datblygiad ymarfer critigol, dadansoddiadol ac adfyfyriol.

Bydd ffocws ar anfantais, gormes ac amddifadedd; a hyn yn arwain at bwyslais ar ymyriad mewn gwaith cymdeithasol a chyd-destunau yr ymarfer o fewn gwaith cymdeithasol.

​Ym mlwyddyn dau, bydd ffocws ar gymhwyso gwybodaeth am waith cymdeithasol, sgiliau a gwerthoedd yn cynnwys canfyddiadau ymchwil yn eu hymarfer ac yn eu gwaith academaidd a asesir gyda phwyslais ar fyfyrwyr yn arddangos datblygiad eu hymarfer critigol, dadansoddiadol ac adfyfyriol.

Bydd blwyddyn tri wedyn yn cynnig cyfle i fyfyrwyr adeiladu ar y wybodaeth, y sgiliau a’r gwerthoedd a gafwyd ym mlwyddyn dau, a’r myfyrwyr yn arddangos barn broffesiynol, ymyriad ac adfyfyrio critigol ar draws eu hymarfer ac o fewn gwaith academaidd asesedig.​

Neilltuir tiwtor personol i bob myfyriwr sy’n ymrestru ar gwrs BSc (Anrh) Gwaith Cymdeithasol, tiwtor a fydd yn cynnig cymorth tiwtorial i grwpiau ac i unigolion. Mae gan staff radd mewn gwaith cymdeithasol, profiad helaeth o weithio ym maes gwaith cymdeithasol ac yn tynnu ar hyn i wella profiad myfyrwyr o ddysgu’r pwnc. Addysgir myfyrwyr drwy ystod o ddulliau dysgu ac addysgu, gan cynnwys grwpiau yn dysgu drwy brofiad a datrys problemau, darlithoedd a seminarau rhyngweithiol ynghyd â chynnwys y cyfryngau er mwyn dod i ddeall profiad pobl ag anghenion gofal cymdeithasol a’u gofalwyr yn well. Caiff myfyrwyr gymorth pellach drwy’r defnydd o ‘Moodle’, y Rhith Amgylchedd Dysgu.

Gosodir myfyrwyr o fewn grwpiau ‘Asiantaeth Ymbarél’ Awdurdod Lleol drwy gydol eu hastudiaethau , ac yna yn cael y cyfle i adeiladu perthynas waith broffesiynol gyda chymheiriaid a gweithwyr proffesiynol o fewn ei Hawdurdod Lleol. Treulir rhan sylweddol o’r cwrs mewn sefyllfaoedd ymarferol o fewn asiantaethau yn Ne Cymru; felly, bydd y gallu i deithio i ac o fewn asiantaethau ymarfer yn fanteisiol.

Tra’n astudio ar gwrs gradd gwaith cymdeithasol, gofynnir i fyfyrwyr ddangos eu bod yn gallu defnyddio dulliau a methodolegau Technoleg Gwybodaeth a Chyfathrebu (TGCh) i gynorthwyo eu dysgu a’u hymarfer.

Bydd asesu meysydd unigol astudiaeth yn cynnwys cyfuniad o wahanol ddulliau o fynd ati: drwy ddysgu ar leoliad, ymarferion efelychu/astudiaethau achos, traethodau ac aseiniadau, adroddiadau, cyflwyniadau poster, cyflwyniadau grŵp ac unigol ac arholiadau.

Yn ogystal, mae gofyn i fyfyrwyr gynhyrchu portffolios sy’n berthnasol i’w dysgu drwy ymarfer, sy’n cynnwys arsylwadau o ymarfer ac adroddiadau adfyfyriol ar sail eu harsylwadau.

Mae myfyrwyr cwrs gradd gwaith cymdeithasol yn derbyn adborth a chyngor ymlaen llaw (feed forward) yn electronig i holl waith a asesir yn academaidd ac maen nhw’n cael eu hannog drwy’r broses diwtorial bersonol i adolygu’r adborth a datblygu sgiliau academaidd a gwaith cymdeithasol ar sail ymarfer.

Ar ôl cwblhau gradd BSc (Anrh) Gwaith Cymdeithasol a’r holl gyfleoedd perthnasol dysgu academaidd a dysgu brofiad drwy brofiad, bydd graddedigion yn gallu cofrestru fel ymarferwyr Gwaith Cymdeithasol a chael mynediad i ystod eang o gyfleoedd cyflogaeth ym maes gwaith cymdeithasol y sectorau statudol, annibynnol a’r trydedd sector. Gall graddedigion gael gwaith gyda phobl ag anghenion gofal cymdeithasol a’u gofalwyr sy’n defnyddio ystod o waith cymdeithasol a gwasanaethau gofal cymdeithasol sy’n mynd i’r afael â materion ac anghenion cymdeithasol cymhleth.

Bydd gofyn hefyd i raddedigion ddilyn Addysg a Dysgu Proffesiynol Parhaus yn eu gyrfa ym maes Gwaith Cymdeithasol ac efallai’n dewis astudio am gymhwyster ôl-radd, er enghraifft addysgu ym maes addysg bellach/uwch neu gwrs Meistr neu Ddoethuriaeth mewn Gwaith Cymdeithasol. Mae cyfleoedd hefyd tu allan i faes Gwaith Cymdeithasol.

Mae'r rhaglen Gwaith Cymdeithasol yn awyddus i gynorthwyo ymgeiswyr o bob cefndir ac â gwahanol brofiad addysgol.

Dylai ymgeiswyr feddu ar TGAU Saesneg Iaith (neu Cymraeg Mamiaith) a Mathemateg gradd C/gradd 4 neu uwch. Y cymwysterau cyfwerth a ystyrir ydy Sgiliau Hanfodol Lefel Dau mewn Cyfathrebu a Chymhwyso Rhif neu Sgiliau Swyddogaethol Lefel 2 yn Saesneg a Mathemateg. Bydd gofyn i ymgeiswyr llwyddiannus i gynnig tystiolaeth o hyn. Rhaid i ymgeiswyr ddangos gallu i astudio ar lefel addysg uwch, fel arfer drwy gymhwyster cydnabyddedig:

• 96 o bwyntiau o ddau bwnc o leiaf Lefel A i gynnwys gradd CC; ystyrir Bagloriaeth Cymru – Tystysgrif Sialens Uwch Sgiliau fel trydydd pwnc
• RQF BTEC Diploma Estynedig Cenedlaethol /Diploma Estynedig Technegol Caergrawnt MMM
• Diploma CACHE gradd C (lleiafswm o 96 pwynt)
• NVQ perthnasol ar lefel 3 neu 4 mewn gwaith cymdeithasol/ maes pwnc gofal cymdeithasol perthnasol
• 96 o bwyntiau o Ddiploma Mynediad i Addysg Uwch. Fel arfer, ni dderbynnir bod credyd Saesneg a Mathemateg y delir â nhw o fewn y Mynediad gyfwerth â TGAU
• 96 o bwyntiau o ddau bwnc o leiaf ar lefel ‘Advanced Highers’ yr Alban i gynnwys graddau DD. Ystyrir 'Scottish Highers' hefyd naill ar eu pen eu hunain neu wedi’u cyfuno ag 'Advanced Highers'.
• 96 o bwyntiau o 'Irish Leaving Certificate' ar lefel ‘Highers’ i gynnwys 2X H3 pwnc.
• Cymhwyster cydnabyddedig arall sy’n cynnig tystiolaeth o’r gallu i astudio ar lefel Addysg Uwch.
• Disgwylir hefyd i ymgeiswyr feddu ar o leiaf 455 awr (13 wythnos) o brofiad gwaith (â thâl neu ddi-dâl) dan oruchwyliaeth mewn lleoliad gofal cymdeithasol. Bydd yn rhaid dangos y gofyniad hwn ar eich ffurflen gais UCAS a rhaid iddo fod wedi’i gwblhau erbyn ichi ddod i gyfweliad. Cyfeiriwch at y tab Profiad isod am ragor o fanylion.

Os ydych yn astudio cyfuniad o’r uchod, neu os na restrwyd eich cymhwyster, cysylltwch â naill ai â’r Adran Dderbyniadau neu gyfeirio at Chwiliad Cwrs UCAS ar gyfer gofynion mynediad. Gellir dod o hyd i wybodaeth bellach am eich gofynion mynediad, yn cynnwys cymwysterau gan yr UE drwy glicio yma.

Gwiriadau Y Gwasanaeth Gwahardd a Datgelu (DBS)
Mae’r holl gynigion yn amodol ar fodloni gofynion Gwasanaeth Gwahardd a Datgelu (DBS) a chwrdd â gofynion cofrestriad Gofal Cymdeithasol Cymru. Rydyn ni hefyd yn argymell eich bod yn cofrestru ar gyfer y Gwasanaeth Diweddaru gan y bydd hyn yn golygu na fydd unrhyw angen am Wiriadau ychwanegol y Gwasanaeth Gwahardd a Datgelu ar gyfer cyfnod eich lleoliadau fel rhan o’ch cwrs. Ceir rhagor o wybodaeth ar broses y Gwasanaeth Gwahardd a Datgelu ar www.cardiffmet.ac.uk/dbs.

Os byddwch yn llwyddiannus ac yn cael cynnig lle, byddwch yn derbyn cyfarwyddyd ysgrifenedig am gychwyn ar y cwrs ac amodau cofrestriad Y Gwasanaeth Gwahardd a Datgelu/ Gofal Cymdeithasol Cymru sydd angen eu diwallu cyn cychwyn y cwrs.

Y Broses Ddethol:
Mae dethol yn seiliedig ar dderbyn ffurflen gais gyflawn UCAS lle asesir eich addasrwydd yn ôl y gofynion mynediad, yn cynnwys oriau profiad gwaith. Caiff holl ymgeiswyr sydd ar y rhestr fer eu gwahodd i ddiwrnod cyfweliad. Dylai ymgeiswyr sy’n cael cymorth/eu noddi gan Adrannau Gwasanaethau Cymdeithasol Awdurdod Lleol yn ardal De Cymru wneud cais uniongyrchol drwy eu Hadrannau Hyfforddi eu hunain a fydd wedyn yn cychwyn y broses ddethol.

Yn anffodus, oherwydd nifer gyfyngedig, ni ellir gwarantu lle i ymgeiswyr sy’n dewis y brifysgol fel eu dewis yswiriant.

Ymgeiswyr Rhyngwladol
Bydd angen i fyfyrwyr lle nad Saesneg ydy eu mamiaith ddarparu tystiolaeth o’u rhugledd o leiaf i safon IELTS 6.0 neu gyfwerth. Am fanylion llawn am y modd i wneud cais a chymwysterau iaith Saesneg, ewch i’r Tudalennau rhyngwladol ar y we.

Sut i Wneud cais:
Dylid gwneud ceisiadau am y cwrs hwn (amser llawn) ar-lein i UCAS www.ucas.com. I gael rhagor o wybodaeth am geisiadau amser llawn a rhan amser, ewch i'n tudalennau Sut i Wneud Cais. 

Myfyrwyr Hŷn

Ymgeisydd hŷn yw unrhyw un dros 21 oed na aeth i'r brifysgol ar ôl ysgol neu goleg. Mae Met Caerdydd yn croesawu ceisiadau gan ymgeiswyr hŷn a gellir dod o hyd i gyngor a gwybodaeth bellach yma.

Cyfweliad Unigol:

Bydd eich cyfweliad unigol yn para tua 15-20 munud ac fe’i cynhelir drwy MS Teams gan aelodau staff academaidd Prifysgol Metropolitan Caerdydd a Choleg Penybont, ochr yn ochr ag ymarferwyr gwaith cymdeithasol ac unigolion sy'n defnyddio gwasanaethau gwaith cymdeithasol a gofal cymdeithasol, sy'n ymwneud â'r Rhaglen. Anogir ymgeiswyr i ymgyfarwyddo â'r wybodaeth ar wefan Gofal Cymdeithasol Cymru sy'n ymwneud â Chod Ymarfer Proffesiynol Gofal Cymdeithasol Cymru ar gyfer Gofal Cymdeithasol (2017), a deddfwriaeth gofal cymdeithasol yng Nghymru.

Gofynion Profiad:

Mae'n ofynnol i ymgeiswyr fod â lleiafswm o 455 awr (13 wythnos) o brofiad gwaith (â thâl neu ddi-dâl) dan oruchwyliaeth mewn lleoliad gofal cymdeithasol.

Nid oes terfyn amser o ran pryd y cwblhawyd y profiad gwaith hwn, ond byddai profiad mwy diweddar yn cryfhau eich cais. Nid oes rhaid ennill profiad mewn un bloc a gallai ddod o brofiad llawn amser neu ran amser, â thâl neu wirfoddol neu o brofiad ar leoliad dros gyfnod hwy o amser.

Mewn amgylchiadau eithriadol, bydd y rhaglen hefyd yn ystyried yr ymgeiswyr hynny sydd â phrofiad personol fel unigolyn ag anghenion gofal cymdeithasol neu fel gofalwr. Er enghraifft, ceisiadau gan unigolion sydd wedi bod yn brif ofalwr, ar sail sylweddol a rheolaidd, i berthynas, ffrind, neu gymydog neu blentyn/person ifanc sy'n derbyn gofal gan yr Awdurdod Lleol - hynny yw, person â phrofiad o fod mewn gofal. Mewn amgylchiadau o'r fath, gellir cryfhau ceisiadau â phrofiad ychwanegol o wirfoddoli/gofal cymdeithasol â thâl hefyd.

Gellir ennill profiad mewn ystod eang o rolau â thâl neu wirfoddol ym maes gofal cymdeithasol:

• Gyda phlant a theuluoedd mewn lleoliadau gofal cymdeithasol megis Dechrau'n Deg, timau Awdurdodau Lleol, Gweithredu dros Blant, Barnardos a chartrefi preswyl;
• Gydag oedolion mewn lleoliadau gofal cymdeithasol megis Timau Oedolion Awdurdodau Lleol, llety â chymorth, cartrefi preswyl/nyrsio, elusennau sy'n gweithio gyda phobl ag anableddau; elusennau trais domestig, gwasanaethau digartrefedd a sefydliadau camddefnyddio sylweddau;
• Mewn lleoliadau cwnsela neu weithio un-i-un mewn lleoliadau gwaith ieuenctid a chymunedol;
• Mewn lleoliadau addysg lle mae'r rôl yn ymwneud â gwaith uniongyrchol gyda phlant ag anghenion ychwanegol neu'n gweithio mewn addysg brif ffrwd a/neu feithrinfeydd/crèches.

At gyfer ymholiadau cyffredinol, cysylltwch â’r Tîm Derbyniadau ar 029 2041 6044 neu anfon e-bost at askadmissions@cardiffmet.ac.uk.

Ar gyfer ymholiadau penodol i’r cwrs, cysylltwch â Chyfarwyddwr y Rhaglen BSc (Anrh) Gwaith Cymdeithasol, Suzanne Gannon-Lewis
Ebost: sgannon-lewis@cardiffmet.ac.uk 
Ffôn: 029 2041 6818​​

Neu

Cyfarwyddwr y Rhaglen, Anthony Lewis (Coleg Penybont)
Ebost: ALewis@bridgend.ac.uk 
Ffôn: 01656 302 302