Mae'r BA (Anrh) Hysbysebu a Rheoli Marchnata ym Met Caerdydd yn radd arbenigol mewn marchnata ac wedi'i datblygu ar y cyd â maes llafur
Sefydliad yr Ymarferwyr Hysbysebu (IPA) er mwyn sicrhau bod y cynnwys addysgu’n cyd-fynd yn dda â disgwyliadau’r diwydiant. Mae gan y cwrs enw da am ei gyfeiriadedd galwedigaethol - bydd dod yn 'Farchnatwr Met’ yn eich galluogi i ennill yr wybodaeth academaidd a'r sgiliau ymarferol sydd eu hangen i gael gwaith yn y diwydiant hysbysebu a marchnata.
Bydd y radd newydd yn ceisio sicrhau achrediad gan yr IPA a bydd yn galluogi myfyrwyr i ddatblygu'r sgiliau a'r gallu i feddwl yn greadigol a defnyddio'r offer diweddaraf mewn ymgyrchoedd hysbysebu integredig modern. Mae hysbysebu'n parhau i fod â phroffil uchel yn y sector cyfathrebu marchnata, yn enwedig o ran gweithgareddau datblygu brand.
Mae'r cwrs hwn yn cynnig cyfle i fyfyrwyr ddatblygu eu gwybodaeth a'u sgiliau i ddod yn wybodus iawn am bob agwedd ar hysbysebu. Mae hyn yn galluogi myfyrwyr i ddatblygu a chynllunio ymgyrchoedd hysbysebu ar y cyd â gweithgareddau marchnata eraill, hyrwyddo, cyfryngau uniongyrchol a digidol. Mae'r radd hon hefyd yn cynnwys elfennau pwysig o'r maes marchnata ehangach er mwyn sicrhau y gall myfyrwyr ymuno â'r farchnad graddedigion gyda’r gallu i gyfrannu'n effeithiol at bob elfen o farchnata. Byddwch yn meddu ar ystod o sgiliau ymarferol gan y byddwch yn cael eich addysgu i ddefnyddio meddalwedd safonol y diwydiant sy'n rhoi sgiliau gweledol i chi, ochr yn ochr â datblygu sgiliau cyfathrebu llafar ac ysgrifenedig.
Yn ogystal â hyn, fel Marchnatwr Met, byddwch yn gallu cymryd rhan yn ein grŵp myfyrwyr CIM a dilyn yn ôl troed ein myfyrwyr arobryn
trwy gymryd rhan yng ngweithgareddau creadigol ac entrepreneuraidd CIM. Bydd y gystadleuaeth yn eich galluogi i brofi sut beth yw gweithio i asiantaeth farchnata drwy weithio ar ymgyrch ar gyfer brand diwydiant adnabyddus, gyda'r 12 gorau’n cael eu gwahodd i gyflwyno’u syniadau i'r cleient wyneb yn wyneb.
Mae gan ddarlithwyr y cwrs wybodaeth academaidd a phrofiad mewn diwydiant er mwyn datblygu'r sgiliau sydd eu hangen arnoch i ddod yn raddedigion marchnata cyflogadwy iawn. Byddwch yn ymuno â 'melin drafod' hysbysebu a marchnata, gan roi eich gwybodaeth a'ch sgiliau ar waith yn ystod eich asesiadau a chyfleoedd lleoliad gwaith. Bydd blwyddyn lleoliad gwaith ddewisol rhwng eich ail flwyddyn a'ch blwyddyn olaf yn gwella cyflogadwyedd ac yn cynnig profiad gwerthfawr a chyfleoedd rhwydweithio o fewn y diwydiant i fyfyrwyr.
Blwyddyn Sylfaen
Gellir astudio’r radd hon fel gradd amser llawn tair blynedd neu radd pedair blynedd sy’n cynnwys blwyddyn o astudio sylfaenol. Bwriad ein blwyddyn sylfaen yw eich paratoi ar gyfer eich blynyddoedd dilynol o astudio, gan gynnig cyfle i chi gryfhau eich sgiliau, eich gwybodaeth a’ch hyder.
Bydd y flwyddyn sylfaen yn berthnasol i:
- Myfyrwyr nad ydynt wedi cael y nifer gofynnol o bwyntiau Safon Uwch (neu gyfwerth) i ddechrau ar flwyddyn gyntaf y rhaglen radd.
- Myfyrwyr hŷn sydd wedi bod allan o’r system addysg ffurfiol ers peth amser.
Darganfyddwch fwy am y
flwyddyn sylfaen.
Nodwch: Bydd angen i chi wneud cais gan ddefnyddio cod UCAS penodol os ydych yn dymuno ymgymryd â’r 4 blynedd gan gynnwys sylfaen. Cyfeiriwch at Wybodaeth Gwrs Allweddol ar waelod y dudalen hon.
Cynnwys y Cwrs
Mae ein gradd yn dod â phrofiadau byd go iawn i'n harferion addysgu, gan ddarparu dull 'dysgu trwy wneud' sy'n gwarantu dealltwriaeth fanwl o'r broses rheoli marchnata.
Mae aseiniadau'n seiliedig ar sefydliadau lleol, ac rydym yn cynnal darlithoedd gwadd gan weithwyr proffesiynol o gwmnïau fel Cymdeithas Adeiladu'r Principality, Admiral Insurance, Confused.com, Lloyds Bank, a Johnson & Johnson.
Blwyddyn Un (Lefel 4)
Yn eich blwyddyn gyntaf, mae pob un o'r chwe modiwl (120 credyd) yn orfodol ac wedi'u cynllunio i roi cyflwyniad cadarn i chi i fyd Rheoli Hysbysebu a Marchnata.
Addysgir pob modiwl yn Saesneg ac mae darpariaeth cyfrwng Gymraeg sy'n cyfateb i un modiwl ar Lefel 4 a 5. Nodir hyn isod gyda seren (*).
Modiwlau gorfodol (20 credyd yr un)
- Cyflwyniad i Farchnata*
- Cyfryngau Digidol i Farchnatwyr
- Rheoli Pobl a Sefydliadau
- Rheoli Arian yn Gynaliadwy
- Marchnata a yrrir gan Ddata
- Damcaniaethau Marchnata – Hysbysebu
Blwyddyn Dau (Lefel 5)
Yn eich ail flwyddyn, mae pum modiwl yn orfodol (100 credyd), a byddwch yn dewis un modiwl dewisol (20 credyd).
Byddwch yn gwella eich arbenigedd a'ch galluoedd mewn Rheoli Hysbysebu a Marchnata ac yn rhoi theori ar waith o fewn lleoliad gwaith diwydiant ar gyfer eich modiwl Hysbysebu yn Ymarferol. Byddwch yn cael eich cefnogi i sicrhau lleoliad gwaith perthnasol i ennill profiad ymarferol a dyfnhau eich dealltwriaeth o farchnata yn y byd go iawn i hybu eich cyflogadwyedd.
Modiwlau gorfodol (20 credyd yr un)
- Ymddygiad Defnyddwyr Marchnata
- Cyfathrebu Marchnata Integredig
- Dadansoddeg Digidol a Delweddu
- Dulliau Ymchwil Marchnata*
- Hysbysebu wrth Ymarfer
Hysbysebu wrth Ymarfer (20 credyd yr un)
- Marchnata Cyfryngau Cymdeithasol
- Marchnata Chwaraeon, Digwyddiadau a Nawdd
Blwyddyn mewn diwydiant
Mae gennych yr opsiwn i dreulio blwyddyn mewn diwydiant ar leoliad gwaith ar ôl cwblhau eich ail flwyddyn o astudio yn llwyddiannus. Mae gennym dîm lleoliad gwaith pwrpasol i'ch cefnogi i sicrhau lleoliad. Gall y profiad hwn roi hwb i'ch rhagolygon gyrfa a rhoi mantais i chi wrth wneud cais am swyddi ar ôl graddio.
Blwyddyn Tri (Lefel 6)
Yn eich blwyddyn olaf, mae pedwar modiwl (100 credyd) yn orfodol, a byddwch yn dewis un modiwl dewisol (20 credyd).
Mae gennych yr opsiwn o ymchwilio, ysgrifennu a chyflwyno Cynllun Marchnata a gweithio gyda sefydliad byd go iawn i fynd i'r afael â materion marchnata penodol. Mae'r profiad ymarferol hwn yn cynnig y cyfle i greu cysylltiadau gwerthfawr yn y diwydiant a fydd o fudd i'ch gyrfa yn y dyfodol.
Byddwch hefyd yn datblygu dealltwriaeth fanwl o ymddygiad defnyddwyr byd-eang a hysbysebu strategol fel rhan annatod o'r cymysgedd cyfathrebu marchnata.
Modiwlau gorfodol (20 credyd yr un)
- Marchnata Rhyngwladol a Byd-eang (20 credyd)
- Rheoli Cyfrifon ar gyfer Marchnatwyr (20 credyd)
- Rheoli Hysbysebu Strategol (20 credyd)
- Cynllun Marchnata NEU Draethawd Hir (40 credyd)
Dewiswch UN modiwl dewisol (20 credyd yr un)
- Cynnwys, Hawlfraint a Chreadigrwydd
- Marchnata Dylanwadwyr
- Profiad gwaith diwydiannol^
Cyflwynir modiwlau dewisol yn dibynnu ar y galw ac argaeledd.
^ Os ydych chi'n cymryd lleoliad gwaith diwydiant blwyddyn o hyd rhwng blwyddyn dau a thri, mae gennych chi'r opsiwn i ddewis 'Profiad Gwaith Diwydiannol' fel eich modiwl dewisol. Os na, dewiswch fodiwl dewisol arall.
Dysgu ac Addysgu
Bydd y dull dysgu ac addysgu sy'n canolbwyntio ar y myfyriwr yn cael ei annog drwy ddefnyddio strategaethau addysgu penodol, astudiaethau achos, prosiectau, tiwtorialau, ymarferion ymarferol, wedi'u cefnogi drwy ddefnyddio deunyddiau cymorth priodol, darlithoedd gan arbenigwyr busnes, fideos a meddalwedd gyfrifiadurol. Mae ymgysylltu'n weithredol â'r deunydd pwnc yn gwella dysgu ac mae llawer o'r strategaethau dysgu a ddefnyddir yn hyrwyddo hyn.
Darlithoedd
Mae darlithoedd yn rhan bwysig o'r strategaeth addysgu ar gyfer y rhaglen. Mae darlithoedd yn ffordd effeithiol o gyflwyno deunydd craidd a sefydlu fframwaith ar gyfer modiwl y gellir gosod deunydd arall yn ei erbyn.
Tiwtorialau Pwnc Modiwlaidd
Cyfarfodydd rhwng myfyriwr neu grŵp o fyfyrwyr a darlithydd neu ddarlithwyr yw tiwtorialau ac fe'u defnyddir mewn dwy ffordd o fewn y rhaglen:
- Ehangu ar ddeunydd a gyflwynir mewn darlithoedd drwy ddull datrys problemau sy’n cael ei lywio gan ymholi
- Gwaith adfer i oresgyn unrhyw ddiffygion yng ngwybodaeth gefndir myfyriwr.
Seminarau
Mewn seminarau mae myfyriwr neu fyfyrwyr yn cyflwyno gwaith sydd wedi’i baratoi ymlaen llaw i gyfoedion a darlithydd. Defnyddir y strategaeth hon i ymestyn cysyniadau damcaniaethol neu ymarferol penodol yn ogystal â chyflwyno ymarferion datrys problemau. Defnyddir seminarau yn y rhan fwyaf o fodiwlau ac maent yn rhoi profiad gwerthfawr i fyfyrwyr o sgiliau cyflwyno yn ogystal â rhoi dull i staff asesu dysgu sy'n canolbwyntio ar y myfyriwr.
Gweithdai Ymarferol
Defnyddir gweithdai ymarferol yn helaeth mewn nifer o fodiwlau drwy gydol y rhaglen. Yn y dosbarthiadau hyn gall myfyrwyr ymarfer a mireinio eu sgiliau mewn amgylchedd cefnogol ble gallant gael adborth gan aelod o staff academaidd. Mae gweithdai ymarferol yn dull gwerthfawr o bontio rhwng theori ac ymarfer.
Astudiaethau Achos
Strategaeth addysgu a dysgu yw astudiaethau achos, a ddefnyddir mewn amrywiaeth o fodiwlau; maent yn offeryn asesu defnyddiol hefyd. Cyflwynir problemau cymhleth go iawn neu ffug i fyfyrwyr neu gofynnir iddynt ddatblygu rhai eu hunain ac yna mae gofyn iddynt eu dadansoddi'n fanwl ac yna cyfosod/cyflwyno eu datrysiad eu hunain yn ysgrifenedig neu ar lafar.
Arbenigwyr Busnes
Elfen allweddol o'r profiad dysgu yw'r bwriad i wahodd arbenigwyr busnes, academaidd ac mewn ymarfer, i roi cipolwg ar eu gwaith ymchwil neu weithgarwch busnes. Bydd rhwydwaith o arbenigwyr o'r fath yn helpu i ddarparu gwybodaeth arbenigol yn ogystal ag atgyfnerthu a hyrwyddo cymwysterau'r rhaglen. Gellid gwahodd arbenigwyr o'r fath fel siaradwyr gwadd neu ofyn iddynt ddarparu profiad gweithdy mwy rhyngweithiol lle bo'n briodol.
Bydd pob myfyriwr yn elwa ar y tîm o diwtoriaid personol ymroddedig sy'n darparu pwynt cyswllt personol a rheolaidd. Mae'r Tiwtoriaid Personol yn gweithio'n agos gyda Chyfarwyddwyr y Rhaglen a Thiwtoriaid Blwyddyn i sicrhau bod anghenion myfyrwyr yn cael eu diwallu'n effeithiol a bod eu hamser ym Mhrifysgol Metropolitan Caerdydd yn brofiad dymunol a llwyddiannus.
Yn ogystal â'r Tiwtoriaid Personol, darperir y cymorth a'r arweiniad academaidd penodol ar gyfer y cyrsiau unigol gan Gyfarwyddwr y Rhaglen a'r Tiwtor Blwyddyn perthnasol. Mae hyn yn arbennig o bwysig o ran y dewis o opsiynau sydd ar gael ym mlwyddyn dau a thri a dewis llwybrau.
Asesu
Cewch eich asesu'n barhaus drwy gydol y cwrs ar sail gwaith cwrs, cyflwyniadau ac arholiadau. Bydd asesiadau ar ffurf arholiadau (a welir/nas gwelir, llyfr agored, traethodau/atebion byr), traethodau, asesiad ymarferol, gwaith gweledol, cyflwyniadau, adroddiadau unigol a grŵp, y mae'r rhan fwyaf ohonynt yn canolbwyntio ar astudiaethau achosion bywyd go iawn.
Rhoddir adborth drwy gydol y cwrs, yn ffurfiannol a thrwy asesiad ffurfiol. Bydd eich perthynas gyda’ch tiwtor personol hefyd yn eich helpu i weithio gydag adborth, gan nodi cryfderau a gwendidau yn eich gwaith a'ch dull astudio.
Gall myfyrwyr gael gafael ar ystod eang o gymorth ar gyfer ysgrifennu ac ymchwil academaidd drwy nifer o adnoddau amrywiol yn y brifysgol fel y llyfrgell a'r tîm addysgu academaidd.
Cyflogadwyedd a Gyrfaoedd
Mae hysbysebu'n parhau i fod â phroffil uchel o fewn y sector cyfathrebu marchnata. Bydd y cwrs hwn yn paratoi myfyrwyr ar gyfer amrywiaeth o swyddi gan gynnwys rolau asiantaeth megis swyddog gweithredol cyfrifon, cynllunydd a phrynwr digidol a'r wasg, a swyddog creadigol cysyniadol, neu swyddi mewnol fel cynorthwyydd y wasg, dadansoddwr cyfryngau cymdeithasol a gweithredwr arddangosiadau digidol.
Yn ystod y cwrs hwn byddwch yn datblygu'r sgiliau a'r ddealltwriaeth allweddol sydd eu hangen ar gyfer busnes gydag arbenigedd mewn rheoli marchnata sydd yn ganolog i bob swyddogaeth fusnes. Ar ôl cwblhau'r cwrs yn llwyddiannus bydd y sgiliau gennych i gael swydd mewn rheoli marchnata, gan roi eich sgiliau ar waith mewn swyddi hysbysebu, ymchwil marchnata, rheoli gwerthiant, rheoli cynnyrch, gwasanaeth cwsmeriaid, cysylltiadau cyhoeddus a rheoli busnes.
Mae'r cwrs hwn wedi'i gynllunio ar y cyd â Sefydliad yr Ymarferwyr Hysbysebu (IPA), er mwyn rhoi cyfle i chi gael eich eithrio o'i gymwysterau proffesiynol. Byddwch hefyd yn gallu ymuno â'n grŵp myfyrwyr CIM sy'n annog pob myfyriwr i gymryd rhan yn ein cymuned dysgu marchnata drwy drefnu siaradwyr gwadd a rheoli digwyddiadau sy'n canolbwyntio ar farchnata. Bydd cynnwys siaradwyr deinamig a digwyddiadau rhwydweithio defnyddiol yn gwella’ch profiad dysgu. Yn olaf, byddwch yn gallu cymryd rhan mewn gweithgareddau entrepreneuraidd fel cymryd rhan yng nghystadleuaeth
CIM Pitch.
Mae'r opsiwn o gynnwys blwyddyn o brofiad mewn diwydiant ym mlwyddyn tri wedi'i gynnwys i'ch galluogi i gwblhau'r radd gyda lefel o brofiad ymarferol. Gellir cynnwys yr opsiwn hwn o brofiad ymarferol yn y cwrs gradd tair blynedd drwy wneud gwaith ymarferol mewn diwydiant yn ystod y tymor neu adeg cyfnodau o wyliau yn ystod y cwrs.
Nod y cwrs yw bod astudio a phrofiad ymarferol yn rhoi'r gobaith gorau o gael swydd ar ddiwedd y cwrs gradd. O'r herwydd, cewch gyfle i raddio gyda sylfaen eang o wybodaeth farchnata a'r potensial i fod yn arbenigwr ar ddefnydd strategol o gysylltiadau cyhoeddus, marchnata, marchnata digidol, cyfathrebu marchnata integredig, brandio a marchnata byd-eang. Yn ychwanegol, byddwch wedi cael profiad 'byd go iawn', cyfle i gymryd rhan yn ein cymuned ddysgu CIM. Dylai myfyrwyr Marchnata Met Caerdydd sefyll allan oherwydd eu gallu i gymhwyso gwybodaeth ddamcaniaethol mewn amgylchedd ymarferol.
Gofynion Mynediad a Sut i Wneud Cais
Cynigion Nodweddiadol
Mae’r gofynion canlynol yn seiliedig ar gynigion nodweddiadol sy’n berthnasol i ddechrau ar flwyddyn 1 y radd.
Os nad ydych yn bodloni’r gofyniad mynediad uchod, rydym hefyd yn cynnig
Flwyddyn Sylfaen sy’n caniatáu gwneud cynnydd i Flwyddyn 1.
-
Pwyntiau tariff: 112
-
Cynnig cyd-destunol: Gweler ein tudalen
cynigion cyd-destunol.
-
TGAU: Pum TGAU ar Radd C / 4 neu uwch, gan gynnwys Saesneg Iaith / Cymraeg Iaith Gyntaf a Mathemateg / Mathemateg – Rhifedd.
-
Gofyniad Iaith Saesneg: IELTS Academaidd 6.0 yn gyffredinol gydag o leiaf 5.5 ym mhob elfen, neu gyfwerth.
-
Pynciau Safon Uwch: O leiaf tair Safon Uwch i gynnwys Graddau CCC. Does dim angen pynciau penodol. Bagloriaeth Cymru – Ystyrir Tystysgrif Her Sgiliau Uwch fel trydydd pwnc.
-
Diploma Cenedlaethol BTEC / Diploma Estynedig Technegol Caergrawnt: DMM
-
Lefel T: Teilyngdod.
-
Diploma Mynediad i Addysg Uwch: Does dim angen pynciau penodol.
-
Diploma Bagloriaeth Ryngwladol (IB): 2 x H5. Does dim angen pynciau penodol.
-
Tystysgrif Gadael Iwerddon: 2 x gradd H2. Does dim angen pynciau penodol. Ystyrir pynciau lefel uwch yn unig gydag isafswm gradd H4.
-
Advanced Highers yr Alban: Graddau DD. Does dim angen pynciau penodol. Ystyrir Highers yr Alban hefyd, naill ai ar eu pennau eu hunain neu ar y cyd ag Advanced Highers.
Derbynnir cyfuniadau o’r cymwysterau uchod os ydyn nhw’n cwrdd â’n gofynion lleiaf. Os nad yw eich cymwysterau wedi’u rhestru, cysylltwch â
Derbyniadau neu cyfeiriwch at
Chwiliad Cwrs UCAS.
Mae rhagor o wybodaeth ar gymwysterau Tramor i’w gweld
yma.
Os ydych yn ymgeisydd hŷn, mae gennych brofiad perthnasol neu
RPL yr hoffech i ni ei ystyried, cysylltwch â Derbyniadau.
Sut i Ymgeisio
Mae rhagor o wybodaeth ar sut i ymgeisio i’w gweld
yma.
Cysylltu â Ni