Mae canolfan glinigol amlddisgyblaethol ym Met Caerdydd yn cynnig gweledigaeth newydd ar gyfer darparu gofal iechyd

Newyddion | 25 Ionawr 2024

Mae’r genhedlaeth nesaf o ymarferwyr iechyd yn dysgu eu crefft mewn canolfan iechyd sy’n arwain y sector ym Mhrifysgol Metropolitan Caerdydd yn dilyn buddsoddiad £1.3m i greu gofod clinig cydweithredol ar draws disgyblaethau iechyd lluosog a bydd yn darparu gwasanaethau gofal iechyd y GIG a phreifat.

Mae Hyb Iechyd Clinigol Perthynol ar gampws Llandaf y Brifysgol yn gweld myfyrwyr ar draws Deieteg, Podiatreg, Therapi Iaith a Lleferydd, Gwyddor Gofal Iechyd, Seicoleg Glinigol a Thechnoleg Ddeintyddol yn gweithio’n symbiotig o un man pwrpasol lle maent yn cymryd cyfrifoldeb am drefnu a darparu gofal i gleifion, a gefnogir gan oruchwylwyr ymarfer.

Heddiw (25 Ionawr 2024) bu Eluned Morgan AS, y Gweinidog dros Iechyd a Gwasanaethau Cymdeithasol, ar daith o amgylch y cyfleusterau ym Met Caerdydd ynghyd ag uwch arweinwyr o Fwrdd Iechyd Prifysgol Caerdydd a’r Fro, Bwrdd Iechyd Cwm Taf Morgannwg ac Addysg a Gwella Iechyd Cymru.

Bydd y gofod pwrpasol ar gyfer disgyblaethau iechyd lluosog yn cynnig cyfleoedd dysgu byd go iawn i fyfyrwyr lle bydd gofal cleifion yn croesi rhwng y darpariaethau gofal iechyd a ddarperir ar y safle. Ar gyfer cleifion, nod y ganolfan yw gwella eu profiad trwy leihau amseroedd aros rhwng atgyfeiriadau i dimau iechyd eraill a chreu taith ddi-dor o dîm i dîm, tra hefyd yn lleddfu pwysau gan fyrddau iechyd lleol.

Gallai hyn gynnwys, er enghraifft, claf â diabetes yn cael ei drin am glwyf traed yn y clinig podiatreg a chael ei atgyfeirio at y tîm dieteteg i reoli ei siwgrau gwaed ac yna i seicoleg glinigol i drafod ei les – heb restrau aros hir rhwng atgyfeiriadau a theithio rhwng clinigau.

Mae’r buddsoddiad o £1.3m gan y Brifysgol, sy’n cynnwys bron i £400,000 o gyllid grantiau cyfalaf gan Lywodraeth Cymru a ddyrannwyd drwy Gyngor Cyllido Addysg Uwch Cymru (CCAUC), yn golygu bod myfyrwyr yn dysgu mewn cyfleusterau o’r radd flaenaf ar y campws. Mae’r rhain yn cynnwys theatr llawdriniaethau achos diwrnod; cyfres lawn o wasanaethau podiatreg; ystafelloedd ymgynghori o safon y GIG ar gyfer cleifion dieteteg, seicoleg a thechnoleg ddeintyddol; labordai patholeg efelychiedig ac ardaloedd cleifion mewnol/allanol; cegin hyfforddi; ystafell rhith-realiti ac ardal clinigwyr therapi lleferydd ac iaith.

Dywedodd Katie Thirlaway, Deon Ysgol Chwaraeon a Gwyddorau Iechyd Met Caerdydd: “Mae’r Hyb Iechyd Clinigol Perthynol yn ffordd newydd o ddarparu gofal iechyd sy’n ailfeddwl sut y gall ein rhaglenni iechyd weithio ar y cyd mewn un hwb pwrpasol. Mae gennym broffesiynau sy’n dysgu oddi wrth, gyda ac am ei gilydd mewn lleoliad amlddisgyblaethol.

“Mae hyn yn golygu, ar ddiwedd eu gradd, y byddwn yn cynhyrchu ymarferwyr sydd wedi’u paratoi’n dda i weithio’n rhyngbroffesiynol diolch i ofod dysgu pwrpasol sy’n gweld myfyrwyr yn gweithio’n ddilys gyda chleifion a’i gilydd o ail dymor eu blwyddyn gyntaf o astudio.

“Mae gallu gwasanaethu ein cymuned leol a chefnogi iechyd a lles pobl ar draws de Cymru yn ymrwymiad rydym wedi ei wneud fel Prifysgol. Rydym yn edrych ymlaen i wneud cyfraniad cadarnhaol at leihau amseroedd aros a helpu pobl i aros yn iach ac allan o’r ysbyty.”

Mae’r cyfleusterau wedi dal sylw Prifysgol Caerdydd gyfagos sy’n gweithio gyda Met Caerdydd ar gyfnewid lleoliad rhyngbroffesiynol a fydd yn gweld myfyrwyr o’i Hysgol Deintyddiaeth yn astudio yn y Hyb Iechyd Clinigol Perthynol yn ystod eu gradd. Bydd Met Caerdydd hefyd yn cynnig cyfleoedd lleoliad i fyfyrwyr Ysgol Fferylliaeth Prifysgol Caerdydd o fewn y canolbwynt, a fydd yn ei dro yn caniatáu i fyfyrwyr gwyddorau iechyd Met Caerdydd ddysgu’n uniongyrchol gan fyfyrwyr Fferylliaeth.