Cynnwys y Cwrs
Mae MA Newyddiaduraeth Arbenigol yn cynnig fframwaith modiwlaidd, sy’n darparu’r wybodaeth, y sgiliau a’r ddealltwriaeth sylfaenol i allu cael gwaith fel newyddiadurwr.
Byddwch yn datblygu sgiliau cyfathrebu ac ysgrifennu cryf wrth ganolbwyntio ar eich arbenigedd penodol ac yn magu hyder wrth ysgrifennu gwahanol fathau o newyddiaduraeth. Cyfunir y sgiliau hyn â chynhyrchu amlgyfrwng, sy’n eich galluogi i ddylunio, ffilmio a golygu eich gwaith eich hun.
Ysgrifennu Cynnwys
Bydd y modiwl hwn yn rhoi’r sgiliau allweddol sydd eu hangen ar fyfyrwyr i ysgrifennu fel newyddiadurwyr ac yna’n canolbwyntio’r sgiliau hynny ar eu dewis arbenigedd, gan gydgrynhoi’r sgiliau angenrheidiol i ysgrifennu erthyglau newyddiadurol clir, egnïol, diddorol a chytbwys ar gyfer llwyfannau print a digidol.
Nod y modiwl yw:
- Atgyfnerthu’r sgiliau angenrheidiol i ysgrifennu erthyglau amlblatfform newyddiadurol clir, egnïol, diddorol a chytbwys.
- Datblygu’r sgiliau angenrheidiol i adnabod, cael a dethol ffeithiau perthnasol a newydd gan ddefnyddio sgiliau a thechnegau newyddiadurol priodol.
- Ymestyn ymwybyddiaeth o’r ffyrdd y mae’r berthynas rhwng newyddiadurwyr, golygyddion, perchnogion, ffynonellau a chynulleidfaoedd yn effeithio ar gynnwys a strwythur erthyglau newyddiadurol.
- Adolygu a gwerthuso’n feirniadol sgiliau ymchwil annibynnol a’r gallu i weithio’n hunanfyfyriol.
Prosiect Cydweithredol
Bydd y modiwl hwn yn cymhwyso’r sgiliau a ddatblygwyd drwy archwilio iaith, cynnwys, arddull a strwythur cylchgronau, papurau newydd a nodweddion ar-lein, ac yn ymestyn sgiliau cynhyrchu digidol.
Nod y modiwl yw:
- Nodi, ffurfio a datblygu perthnasoedd gwaith cydweithredol gyda phartneriaid posibl.
- Datblygu gwaith sy’n gysylltiedig ag ymdrechion proffesiynol a nodau gyrfa.
- Cyfnerthu sgiliau fel ymarferydd proffesiynol sy’n gweithio mewn maes dewisol.
- Datblygu gallu entrepreneuraidd yn ymarferol trwy brosiect cydweithredol.
Newyddiaduraeth Amlblatfform
Bydd y modiwl hwn yn rhoi’r sgiliau hanfodol allweddol i fyfyrwyr ddod yn newyddiadurwyr amlgyfrwng ac addasu’r sgiliau hynny i’w maes arbenigol.
Nod y modiwl hwn yw:
- Atgyfnerthu a chymhwyso sgiliau newyddiadurol a ddatblygwyd mewn modiwlau eraill i wahanol lwyfannau cyfryngau digidol.
- Datblygu’r sgiliau angenrheidiol i integreiddio a datblygu prosiectau amlgyfrwng yn llawn.
- Datblygu sgiliau ar gyfer gofynion cynhyrchu penodol newyddiaduraeth amlgyfrwng.
- Datblygu sgiliau ar gyfer gofynion cynhyrchu penodol newyddiaduraeth amlgyfrwng.
Safbwyntiau Beirniadol mewn Newyddiaduraeth
Bydd y modiwl hwn yn rhoi dealltwriaeth i fyfyrwyr o dirwedd newidiol newyddiaduraeth gyfoes, y sgiliau myfyriol angenrheidiol i weithredu fel newyddiadurwr llwyddiannus, gan archwilio’r prosesau a’r sgiliau angenrheidiol ar gyfer ymgymryd ag ymchwil drylwyr, credadwy, moesegol a gwerth chweil.
Nod y modiwl hwn yw:
- Rhoi dealltwriaeth i fyfyrwyr o’r prosesau a’r sgiliau angenrheidiol ar gyfer ymgymryd ag ymchwil drylwyr, gredadwy, moesegol a gwerth chweil.
- Archwilio’r cysyniad o sgiliau myfyriol sy’n addas i’w defnyddio mewn cyd-destunau newyddiadurol academaidd a phroffesiynol, ac ymgysylltu’n weithredol ynddynt.
- Cymhwyso gwybodaeth ddamcaniaethol yn feirniadol mewn cyd-destun ymarferol.
- Datblygu dull myfyriol beirniadol o ymarfer newyddiadurol.
Newyddiaduraeth, Moeseg a’r Gyfraith
Bydd y modiwl hwn yn datblygu gwybodaeth a dealltwriaeth fanwl o gyfraith a moeseg newyddiadurol.
Nod y modiwl hwn yw:
- Darparu gwybodaeth ddatblygedig a dealltwriaeth feirniadol o’r gyfraith a’i strwythurau fel y maent yn ymwneud ag ymarfer newyddiaduraeth.
- Datblygu gwybodaeth a dealltwriaeth o’r fframwaith cyfreithiol, moesegol a rheoleiddiol y mae newyddiaduraeth yn cael ei ymarfer ynddo.
- Galluogi myfyrwyr i gymhwyso gwybodaeth a dealltwriaeth wrth greu cynnwys newyddiadurol.
Ymarfer Proffesiynol mewn Newyddiaduraeth
Yn ogystal â lleoliad gwaith mewn sefydliad cyfryngau perthnasol, bydd myfyrwyr hefyd yn datblygu sgiliau a gwybodaeth hanfodol sydd eu hangen ar gyfer gwneud bywoliaeth lwyddiannus yn nhirwedd y cyfryngau newydd.
Nod y modiwl hwn yw:
- Darparu ymwybyddiaeth o arferion a methodolegau yn y gweithle o fewn y diwydiant newyddiaduraeth sy’n dylanwadu ar gasglu, golygu a lledaenu gwybodaeth.
- Archwilio y potensial ar gyfer gwneud bywoliaeth lwyddiannus yn nhirwedd y cyfryngau newydd.
- Datblygu ymwybyddiaeth gynhwysfawr o strwythur gweinyddol y diwydiant a rolau a chyfrifoldebau swyddi unigol.
- Hyrwyddo dull datrys problemau o ran yr amgylchedd gwaith.
Prosiect Mawr Terfynol
Mae’r modiwl hwn yn caniatáu i fyfyrwyr greu portffolio newyddiadurol o’u harbenigedd dewisol. Mae’r prosiect ymarferol neu ddamcaniaethol estynedig yn rhoi cyfle i fyfyrwyr am ddarn sylweddol o waith newyddiaduraeth ymarferol annibynnol, o safon broffesiynol, neu astudiaeth academaidd sy’n mynd i’r afael â maes penodol o newyddiaduraeth.
Dysgu ac Addysgu
Addysgir y rhan fwyaf o’r modiwlau drwy weithdai a seminarau gwaith grŵp. Bydd rhai modiwlau hefyd yn cynnwys tiwtorialau unigol, a darperir y modiwl traethawd hir yn gyfan gwbl drwy diwtorialau un i un gyda’ch goruchwyliwr.
Mewn gweithdai a seminarau, gwneir defnydd llawn o dechnoleg y Brifysgol, a bydd deunydd cwrs yn cael ei ddarparu a’i storio yn ein Rhith-amgylchedd Dysgu. Bydd modd i chi gael mynediad at y Rhith-amgylchedd Dysgu o bell, a byddwn yn annog i chi wneud hynny.
Mae’r modiwlau’n werth un ai 20 neu 40 credyd. Mewn modiwl 20 credyd, byddwch chi’n cael 22 awr o addysgu wedi’i amserlennu, a bydd disgwyl i chi gyflawni 178 awr o astudio annibynnol. Cynhelir y traethawd hir, sy’n 40 credyd, drwy astudiaeth annibynnol yn bennaf. Byddwch yn cael 4 awr o oruchwyliaeth tiwtorial (sy’n cynnwys goruchwylwyr yn edrych dros eich gwaith) a bydd disgwyl i chi gyflawni 396 awr o astudiaeth annibynnol.
Penodir tiwtor personol i bob myfyriwr a fydd ar gael i gynnig cyngor academaidd, cefnogaeth fugeiliol, a chynllunio datblygiad personol. Mae gan diwtoriaid oriau swyddfa wythnosol hefyd.
Cyflawnir amgylchedd beirniadol ond cefnogol drwy gyfuniad o weithdai, seminarau ymchwil ac e-ddysgu. Byddwch yn cael eich cyflwyno i faterion ymarferol paratoi a chyflwyno eich gwaith i’w gyhoeddi.
Yn Met Caerdydd, byddwch yn cael profiad dysgu, o’r cam ymsefydlu i raddio, sy’n gydlynus ac yn datblygu eich hunaniaeth o fewn eich rhaglen astudio. Mae nodweddion penodol y profiad dysgu ar y radd MA mewn Newyddiaduraeth Arbenigol yn cynnwys:
- Ymchwilwyr o fri a thiwtoriaid profiadol o’r diwydiant sy’n ganolog i’r pecyn dysgu a ddarperir i’n myfyrwyr.
- Cyfleusterau cyfryngau ar y campws a gaiff eu defnyddio i wella profiad dysgu’r myfyrwyr ac i gymhwyso’r wybodaeth ddamcaniaethol mewn lleoliad go iawn.
- Partneriaethau diwydiannol a ddefnyddir fel sail ac i wella darpariaeth y rhaglen.
- Rhaglen radd sy’n bodloni anghenion cyflogwyr.
Cyfleusterau
Mae cyfleusterau cyfryngau ardderchog ar y safle, a diwydiannau cyfryngau ffyniannus yng Nghaerdydd a’r ardal gyfagos, yn dod ynghyd â rhwydwaith o bartneriaid yn niwydiant y cyfryngau i ddarparu rhaglen ddysgu gynhwysfawr sy’n ymwneud ac wedi’i lleoli yn y gwaith. Mae’r rhaglen wedi’i chynllunio i’ch galluogi i gymhwyso’r wybodaeth a gafwyd o gwricwlwm y radd yn y byd go iawn, a chael profiad gwerthfawr i’w ddefnyddio fel sail ar gyfer astudiaeth bellach neu gyflogaeth yn y dyfodol.
Asesu
Rydyn ni’n ymroddedig i arferion asesu arloesol sy’n cyfateb â chanlyniadau dysgu a nodwyd ar gyfer eich modiwl a’ch gradd. Mae hyn yn golygu bod asesu, lle bo’n bosib, yn canolbwyntio ar wella nid yn unig eich gwybodaeth bynciol, ond y sgiliau sy’n hanfodol wrth ddatblygu eich cyfleoedd cyflogaeth. Mae enghreifftiau o asesu yn cynnwys portffolios ymchwil, gwaith grŵp, portffolios ymarferol, arfer beirniadol a myfyriol ac adolygiadau.
Mae ganddon ni ystod o ddulliau asesu ar draws y radd yn dibynnu ar y modiwl. Asesir modiwlau ymarferol drwy bortffolios a thraethodau beirniadol cysylltiedig, lle mae gofyn i chi fyfyrio a chyd-destunoli eich gwaith. Mae’r modiwlau hyn hefyd yn cynnwys asesu cyfoedion yn ffurfiannol yn y dosbarth ar ffurf gweithdai ymarferol. Nid yw’r rhain yn cyfrif tuag at eich gradd derfynol, ond mae’r sesiynau’n eich helpu i dyfu ac i fyfyrio fel ymarferydd cyfryngau.
Mae modiwlau hefyd yn defnyddio Rhith-amgylcheddau Dysgu ar gyfer asesu, ac mae’n bosib y bydd gofyn i chi edrych ar ddeunydd ar-lein ac ymateb iddo.
Byddwch yn cael cefnogaeth gan diwtor yn y dosbarth a thrwy ein Rhith-amgylchedd Dysgu er mwyn eich paratoi ar gyfer pob pwynt asesu. Mae ganddon ni gyfleusterau llyfrgell ar-lein ac ar y campws hefyd.
Cyflogadwyedd a Gyrfaoedd
Ynghyd â gyrfa mewn newyddiaduraeth, mae’r MA hefyd yn ddewis gwych ar gyfer y rhai sy’n dymuno gwella eu cyfleoedd cyflogaeth a phroffesiynol mewn gyrfaoedd golygyddol a chyhoeddi.
Wrth gwrs, mae sgiliau a thechnegau newyddiadurol allweddol yn ganolog i’r radd. Serch hynny, bydd y radd hon hefyd yn eich annog i ddatblygu sgiliau trosglwyddadwy fel ymreolaeth, cydweithio’n effeithiol, hunangyfeirio, trefnu, menter, ac addasrwydd – sgiliau y mae galw mawr amdanynt yn y gweithle.
Ynghyd â newyddiaduraeth, gallai gradd Meistr mewn Newyddiaduraeth Arbenigol arwain at amrywiaeth o yrfaoedd eraill hefyd, fel: addysgu, ymchwil, cysylltiadau cyhoeddus, marchnata, y gwasanaeth sifil, cyhoeddi, y cyfryngau, a chyflogaeth yn y sectorau cyhoeddus a gwirfoddol.
Mae EDGE Met Caerdydd yn eich cefnogi i ffynnu yn y byd modern. Drwy gydol eich gradd, byddwch yn profi ystod o gyfleoedd i ddatblygu eich cymwyseddau Moesegol, Digidol, Byd-eang ac Entrepreneuraidd drwy ddysgu ar sail problemau a thrwy leoliadau dysgu yn y gwaith. Byddwn ni’n sicrhau eich bod yn cael ystod o gyfleoedd i ddatblygu sgiliau trosglwyddadwy fel cyfathrebu, gwaith tîm ac arweinyddiaeth.
Byddwn ni hefyd yn eich cefnogi i ganfod cyfleoedd i weithio neu astudio dramor. Gall lleoliadau gwaith roi mantais feirniadol i chi wrth gael cyflogaeth broffesiynol ar ôl graddio. Mae graddedigion o’n rhaglen MA mewn Newyddiaduraeth Arbenigol bellach yn gweithio yn y diwydiant cyfryngau proffesiynol gyda Future Fusion New York, Clwb Pêl-droed Dinas Caerdydd, Dead Press a Radio GTFM.
Mae llawer o fyfyrwyr hefyd yn dilyn eu cyfleoedd eu hunain ac yn sefydlu busnesau yn seiliedig ar eu syniadau yn ystod eu hastudiaethau. Mae cymorth menter parhaus ar gael gan y Ganolfan Entrepreneuriaeth sydd wedi’i chynllunio i helpu i ddarparu’r cyfle gorau i greu menter lwyddiannus. Mae hyn yn cynnwys mentora busnes, cyngor cyllido, gofod swyddfa am ddim, a chyfleoedd rhwydweithio.
Gofynion Mynediad a Sut i Wneud Cais
Ystyrir pob ymgeisydd yn sail eu rhinweddau academaidd a’u gallu i ddangos diddordeb a gallu yn y maes pwnc.
Fel arfer, dylai fod gan ymgeiswyr radd anrhydedd dosbarth cyntaf neu ail ddosbarth uwch mewn pwnc perthnasol. Bydd myfyrwyr sy’n bodloni’r meini prawf yn cael gwahoddiad i gyfweliad.
Ymgeiswyr Rhyngwladol:
Bydd angen i fyfyrwyr nad Saesneg yw eu hiaith gyntaf ddarparu tystiolaeth o ruglder i safon IELTS 6.5 neu gyfwerth o leiaf. I gael manylion llawn am sut i wneud cais a chymwysterau Iaith Saesneg ewch i’r
tudalennau Rhyngwladol ar y wefan.
Gweithdrefn Ddethol:
Ffurflen gais, CV, ac enghraifft o ysgrifennu (er enghraifft, gall hwn fod yn ddarn o newyddiaduraeth, blog neu draethawd).
Sut i Wneud Cais:
Dylai ceisiadau ar gyfer y cwrs hwn yn cael ei wneud yn uniongyrchol i’r Brifysgol trwy ein cyfleuster
hunanwasanaeth. I gael rhagor o wybodaeth ewch i’n tudalennau Sut i Wneud Cais yn
www.metcaerdydd.ac.uk/sutiwneudcais..
Os oes gennych ddiddordeb mewn defnyddio credyd gan sefydliad arall, neu os ydych wedi ennill cymwysterau a/neu brofiad i astudio ar gyfer cwrs ym Met Caerdydd, gallwch ddod o hyd i ragor o wybodaeth am hyn ynghyd â gwybodaeth ar sut i wneud cais ar y
dudalen RPL.
Gwybodaeth Ychwanegol
- Os hoffech, gallwch gymryd modiwlau unigol (un neu fwy, yn dibynnu ar eich diddordebau)
- Os hoffech fynd ymhellach, efallai y byddwch chi’n dewis cwblhau Tystysgrif Ôl-raddedig (tri modiwl wedi’u dewis o raglen ôl-raddedig)
- At hynny, mae’n bosib y byddwch chi am gyflawni Diploma Ôl-raddedig (chwe modiwl o un o’n rhaglenni)
- Neu, mae’n bosib y byddwch chi am wneud Gradd Meistr, gan gyflwyno traethawd hir ar ôl cwblhau’r saith modiwl a addysgir.
Ffioedd Dysgu a Chefnogaeth Ariannol:
I gael y wybodaeth ddiweddaraf am ffioedd dysgu a’r gefnogaeth ariannol a allai fod ar gael. Ewch i
www.metcaerdydd.ac.uk/ffioedd.
Ffioedd rhan amser:
Mae’r ffioedd ar sail Modiwlau Sengl oni nodir yn wahanol:
Israddedig = 10 Credyd; Ôl-raddedig = 20 Credyd
Yn gyffredinol, bydd y rhan fwyaf o fyfyrwyr yn gwneud 60 credyd y flwyddyn ar gyfer astudiaeth Israddedig ac Ôl-raddedig; er mwyn cael y gost wirioneddol dylech wirio hyn drwy gysylltu’n uniongyrchol â Chyfarwyddwr y Rhaglen.
Gostyngiad i Weithwyr Partner
Mae gostyngiad ffioedd o 25% ar gael i fyfyrwyr rhan-amser sy’n cael eu cyflogi yn un o ysgolion partneriaeth Prifysgol Metropolitan Caerdydd ar gyfer Addysg a Hyfforddiant Cychwynnol i Athrawon neu gymuned bartneriaeth. Mae meini prawf a thelerau cymhwysedd yn berthnasol. Am ragor o wybodaeth cysylltwch â Derbyniadau.
Cysylltu â Ni