Cynnwys y Cwrs
Troseddeg ac Ymchwiliadau Troseddol – MSc (180 credyd)
Yn ystod yr MSc byddwch yn astudio’r modiwlau canlynol:
-
Materion Beirniadol a Chyfoes mewn Troseddeg (20 credyd) – Nod y modiwl hwn yw cyflwyno myfyrwyr i drosedd a throseddeg a fydd yn anelu at loywi gwybodaeth myfyrwyr sydd eisoes wedi astudio troseddeg. Yn benodol, byddwch yn astudio theori droseddegol a phynciau diddorol gan gynnwys troseddeg werdd a phenydeg. Byddwch hefyd yn archwilio tueddiadau a materion sy’n dod i’r amlwg ym maes troseddeg.
-
Ymchwilio i Droseddau Rhyngwladol a Niwed Cymdeithasol (20 credyd) – Bydd y modiwl hwn yn archwilio troseddau rhyngwladol a thrawswladol, megis troseddau rhyfel, troseddau yn erbyn y ddynoliaeth, hil-laddiad, a throsedd ymddygiad ymosodol. Mae materion hanfodol eraill a fydd yn cael eu trafod yn cynnwys hawliau dynol a’r system cyfiawnder troseddol, troseddau trawswladol megis troseddau cyfundrefnol, masnachu cyffuriau, masnachu pobl, cynhyrchu cyffuriau, a throseddau glas a gwyrdd.
-
Cynnal Ymchwil Troseddegol (20 credyd) – Bydd y modiwl hwn yn datblygu gwybodaeth myfyrwyr am agweddau pwysig ar ymchwil droseddegol, gan ddefnyddio dulliau ansoddol a meintiol. Bydd y modiwl yn rhoi dealltwriaeth glir o nodweddion ymchwil wyddonol drylwyr a moesegol ac yn datblygu gallu’r myfyrwyr i ddylunio ac adeiladu ymchwil droseddegol wrth baratoi ar gyfer eu traethawd hir.
-
Troseddwyr, Dioddefwyr a Bregusrwydd (20 credyd) – Nod y modiwl hwn yw astudio gwendidau megis digartrefedd, camddefnyddio cyffuriau ac alcohol; tlodi; nodweddion gwarchodedig; yn ogystal â Phrofiadau Niweidiol yn ystod Plentyndod (ACES) a ffactorau eraill sy’n cyfrannu at wendidau troseddwyr a dioddefwyr. Bydd y modiwl hefyd yn archwilio taith tystion agored i niwed yn y system cyfiawnder troseddol o’r adroddiad cychwynnol i’r llys.
-
Ymchwilio i Droseddau Treisgar a Difrifol (20 credyd) – Mae’r modiwl hwn yn archwilio‘r gwahanol camau o ymchwiliad trosedd mawr ar gyfer dynladdiad a throseddau treisgar a difrifol eraill. Bydd y modiwl yn ymdrin ag agweddau amrywiol ymchwiliad gan gynnwys gwyddoniaeth fforensig, technegau digidol, ac ymagweddau seicolegol. Bydd myfyrwyr yn ymchwilio i effeithiolrwydd gwahanol ddulliau ymchwilio.
-
Seicoleg a Chymhwysiad Cyfweld Ymchwiliol (20 credyd) – Mae’r modiwl hwn yn archwilio theori a chymhwysiad cyfweld ymchwiliol â’r rhai a amheuir yng Nghymru a Lloegr, a chymhwysiad seicoleg ar hyn. Bydd y modiwl hefyd yn tynnu ar dechnegau cyfweld ymchwiliol a ddefnyddir ledled y byd gan dynnu cymhariaeth rhwng y dechnegau yma.
-
Traethawd Hir (60 credyd) – Mae’r modiwl hwn yn rhoi cyfle i fyfyrwyr gynnal eu prosiect ymchwil eu hunain ar bwnc o’u dewis, gyda chefnogaeth goruchwyliwr traethawd hir. Bydd myfyrwyr yn datblygu eu gwybodaeth mewn maes penodol ac yn datblygu mwy o annibyniaeth yn eu hymagwedd at ymchwil tra’n dilyn canllawiau moesegol llym.
Gwobrau Ymadael
Troseddeg ac Ymchwiliadau Troseddol – PgD (120 credyd)
Yn ystod y Diploma Ôl-raddedig byddwch yn astudio pob un o’r chwe modiwl 20 credyd a restrir uchod, heb y traethawd hir.
Troseddeg – PgC (60 credyd)
Mae dyfarniad ymadael Tystysgrif Ôl-raddedig Troseddeg hefyd ar gael. Yn ystod y cwrs PgC byddwch yn astudio’r tri modiwl 20 credyd cyntaf (Materion Beirniadol a Chyfoes mewn Troseddeg, Ymchwilio i Droseddau Rhyngwladol a Niwed Cymdeithasol a Cynnal Ymchwil Troseddegol).
Dysgu ac Addysgu
Rydym yn defnyddio amrywiaeth o ddulliau addysgu sydd wedi’u cynllunio i fodloni ystod o anghenion dysgu, gan gynnwys gweithdai, seminarau, darlithoedd, ac amgylcheddau dysgu rhithwir. Bydd myfyrwyr hefyd yn cael problemau ymarferol cymhleth efelychiadol y mae’n ofynnol iddynt eu dadansoddi a chreu ymateb priodol ar eu cyfer. Mae’r ymarferion efelychiadol hyn wedi’u cynllunio i ddatblygu sgiliau datrys problemau a gwneud penderfyniadau.
Mae gan bob modiwl 20 credyd oddeutu 200 awr o astudio. Fel arfer, bydd 24 awr o sesiynau a addysgir megis darlithoedd, seminarau a gweithdai, fel arfer , 2 awr wedi’u hamserlennu yr wythnos. Mae tua 176 awr o ddysgu annibynnol dan arweiniad lle mae myfyrwyr yn ymgymryd â’r gwaith darllen sydd ei angen ar gyfer y modiwl ac yn cwblhau eu hasesiad.
Cymorth
Neilltuir tiwtor personol i bob myfyriwr pan fyddant yn dechrau’r cwrs, ac mae’r tiwtor hwn yn eu cefnogi drwy gydol eu gradd. Bydd cyfarfodydd tiwtor personol wedi’u trefnu y bydd myfyrwyr yn eu mynychu, ond mae tiwtoriaid hefyd yn gweithredu polisi drws agored sy’n caniatáu i fyfyrwyr gael mynediad atynt y tu allan i’r cyfarfodydd rheolaidd.
Technoleg a Chyfleusterau
Bydd y radd Meistr mewn Troseddeg ac Ymchwiliadau Troseddol yn cael eu haddysgu ar draws campysau Cyncoed a Llandaf, lle bydd myfyrwyr yn elwa ar amrywiaeth o gyfleusterau gan gynnwys ein ffug lys a’n tŷ safle trosedd, lle byddant yn cymryd rhan mewn senarios trochi, heriol a gynlluniwyd i roi sgiliau myfyrwyr ar waith.
Staff
Mae’r staff ar y rhaglen hon yn dod o amrywiaeth o gefndiroedd, gyda phrofiad cenedlaethol a rhyngwladol o fewn eu harbenigedd. Maent wedi ymrwymo i ddarparu amgylchedd dysgu cefnogol o ansawdd uchel. Bydd ystod o ddulliau addysgegol cyfoes yn cael eu hymgorffori wrth gyflwyno pob modiwl. Mae gan ein staff ystod o brofiad, gan gynnwys cefnogi addysg amgen, profiad helaeth o blismona gan gynnwys ymarfer gweithredol a strategol, ymchwilio i safleoedd trosedd, cyfweld â rhai a amheir, a gweithio i frwydro yn erbyn gweithgareddau cartelau a throseddu cyfundrefol rhyngwladol.
Mae ein staff wedi sefydlu cysylltiadau â sefydliadau a gweithwyr proffesiynol yn y sectorau cyfiawnder troseddol a sectorau cysylltiedig. Felly, rydym yn cynnig amrywiaeth o siaradwyr gwadd sy’n cyflwyno sgyrsiau diddorol a phryfoclyd i fyfyrwyr drwy gydol y rhaglen. Yn ogystal, mae ein cysylltiadau â diwydiant yn cynnig cyfleoedd gwych i fyfyrwyr gael profiad bywyd go iawn gydag asiantaethau cyfiawnder troseddol amrywiol, gan gynnwys gyda’r heddlu a’r gwasanaeth carchardai.
Asesiad
Bydd pob modiwl yn cynnwys asesiadau ffurfiannol a chrynodol.
Mae’r asesiadau’n ddiddorol ac yn amrywiol ac wedi’u cynllunio i ddarparu profiadau dilys i’r myfyrwyr ddangos y cymwyseddau byd go iawn y byddai’n ofynnol iddynt eu defnyddio mewn cyd-destunau proffesiynol.
Caiff yr asesiadau eu cwblhau naill ai ar sail unigol neu ar sail grŵp. Darperir ystod amrywiol o gyfleoedd asesu drwyddi draw, gan gynnwys amrywiadau o brofion ysgrifenedig, cyflwyno, viva ar lafar, ymarferol, a phrofion amlddewis llyfr agored.
Mae dau bwynt asesu i bob modiwl, ac mae’r rhain wedi’u cynllunio i roi’r cyfleoedd gorau i fyfyrwyr ddangos eu cryfderau a’u cefndiroedd addysgol eu hunain.
Rhoddir dyddiadau cyflwyno asesiadau i fyfyrwyr ar ddechrau pob modiwl, yn ogystal â grid trosolwg o’r asesu ar gyfer y flwyddyn academaidd gyfan i’w helpu i gynllunio a rheoli eu hamser yn effeithiol. Mae myfyrwyr yn derbyn adborth unigol ar eu gwaith sy’n nodi cryfderau a meysydd i’w gwella.
Cyflogadwyedd a Gyrfaoedd
Beth alla i ei wneud gyda fy ngradd?
Bydd gradd Meistr Troseddeg ac Ymchwiliadau Troseddol Met Caerdydd yn eich paratoi ar gyfer amrywiaeth o rolau yn y sector cyfiawnder troseddol a thu hwnt. Gallai cyrchfannau traddodiadol gynnwys cyflogaeth mewn:
- Rolau Gwasanaeth yr Heddlu, fel swyddog heddlu, ditectif, staff yr heddlu, ac ati.
- Gwasanaeth Prawf
- Gwasanaeth Carchardai
- Llysoedd y DU, ac amrywiaeth o rolau tebyg eraill
Gallai cyfleoedd eraill gynnwys gweithio gyda:
- Cyllid a Thollau Ei Mawrhydi
- Llu’r Ffiniau
- Yr Asiantaeth Troseddu Cenedlaethol
- Gwasanaethau Diogelwch
- Gwasanaethau Cymdeithasol
- Gweithio fel athro neu ddarlithydd
- Rolau Llywodraeth Ganolog neu Leol
- Elusennau
Bydd cyfle hefyd i astudio ymhellach, gan gynnwys:
- Graddau Meistr Seiliedig ar Ymchwil, fel MRes
- Astudiaeth Ddoethurol, fel PhD neu EdD
Gofynion Mynediad a Sut i Wneud Cais
Disgwylir i ymgeiswyr ar gyfer yr MSc Troseddeg ac Ymchwiliadau Troseddol fodloni’r gofynion sylfaenol canlynol:
- gradd gychwynnol o Brifysgol Metropolitan Caerdydd (gradd Anrhydedd dda o 2:1 neu uwch fel arfer); neu
- gradd gychwynnol a ddyfernir gan gorff dyfarnu graddau cymeradwy arall, (gradd Anrhydedd dda o 2:1 neu uwch fel arfer); neu
- y rhai sydd â chymwysterau proffesiynol perthnasol a phrofiad perthnasol (a ystyrir fesul achos).
Gofynion Iaith Saesneg:
Myfyrwyr nad Saesneg yw eu hiaith gyntaf, isafswm sgôr IELTS o 6.5 yn gyffredinol heb unrhyw is-sgôr yn is na 5.5 (neu gymhwyster cyfatebol).
Sut i Wneud Cais:
Dylid gwneud cais am y cwrs hwn yn uniongyrchol i’r Brifysgol drwy ein cyfleuster
hunanwasanaeth. Am ragor o wybodaeth ewch i’n tudalennau Sut i Wneud Cais yn
www.metcaerdydd.ac.uk/sutiwneudcais.
Os oes gennych ddiddordeb mewn defnyddio credyd o sefydliad arall, neu os ydych wedi ennill cymwysterau a/neu brofiad i astudio ar gyfer cwrs ym Met Caerdydd, gallwch ddod o hyd i ragor o wybodaeth am hyn yn ogystal â gwybodaeth am sut i wneud cais ar y
dudalen RPL.
Ymgeiswyr Rhyngwladol:
Bydd angen i fyfyrwyr nad Saesneg yw eu hiaith gyntaf ddarparu tystiolaeth o ruglder i safon IELTS 6.5 neu gyfwerth o leiaf. I gael manylion llawn am sut i wneud cais a chymwysterau Iaith Saesneg ewch i’r
tudalennau Rhyngwladol ar y wefan.
Gwybodaeth Ychwanegol
Gostyngiad i Weithwyr Partner
Mae gostyngiad ffioedd o 25% ar gael i fyfyrwyr rhan-amser sy’n cael eu cyflogi yn un o ysgolion partneriaeth Prifysgol Metropolitan Caerdydd ar gyfer Addysg a Hyfforddiant Cychwynnol i Athrawon neu gymuned bartneriaeth. Mae meini prawf a thelerau cymhwysedd yn berthnasol. Am ragor o wybodaeth cysylltwch â Derbyniadau.
Cysylltwch â Ni