Mae’r portffolio cyffrous o raddau Chwaraeon ​rhyngddisgyblaethol, sy’n canolbwyntio ar gyflogadwyedd ym Met Caerdydd yn bodloni gofynion galwedigaethol marchnad sy’n ehangu mewn meysydd fel gwyddor chwaraeon, addysg gorfforol ac iechyd, cyfryngau chwaraeon, dadansoddi perfformiad a llawer mwy.

Mae ein graddau’n seiliedig ar ymchwil mwyaf blaenllaw’r byd ac yn cael eu darparu gan staff sy’n gwneud gwaith ymchwil ac ymarferwyr proffesiynol. Maent yn cynnig cysylltiadau â chyrff llywodraethu chwaraeon cenedlaethol a phartneriaid yn y diwydiant. Mae hyn yn golygu y byddwch chi’n datblygu’ch gwybodaeth a’ch sgiliau; yn cael llu o gyfleoedd i ennill profiad ymarferol a defnyddio cyfarpar a chyfleusterau arloesol, wrth baratoi at eich gyrfa o ddewis.

Mae ein menter Campws Agored yn eich galluogi i weithio’n uniongyrchol â phobl ifanc i ddarparu cyfleoedd chwaraeon, sy’n golygu y byddwch chi’n ennill profiad ymarferol amhrisiadwy.

Mae yna lawer o gyfleoedd i ddatblygu sgiliau proffesiynol hefyd gan weithio gyda’n athletwyr a’n timau elite. Yn ogystal â hyn, byddwch yn cael cyfleoedd i fynd ar leoliad gwaith lle byddwch yn cymhwyso eich gwybodaeth ddamcaniaethol.

Fel Prifysgol rydym wedi’n gwreiddio yn ein cymuned, yn ymfalchïo mewn bod yn gynhwysol a chroesawgar. Mae chwaraeon yn dod â phobl at ei gilydd, ac yma ym Met Caerdydd rydym yn defnyddio pŵer chwaraeon i gefnogi, annog a chynnwys ein myfyrwyr, staff a’r gymuned ehangach.

“Diolch i fenter Campws Agored dwi wedi gallu ennill profiad ymarferol fel rhan o’m darlithoedd a pharatoi fy hun ar gyfer fy newis gyrfa. Mae’r fenter wedi darparu sgiliau addysgegol i mi y gallaf eu defnyddio pan fyddaf yn mynd ar leoliad i ysgol gynradd. Er enghraifft, dwi wedi dysgu am ffyrdd gwahanol o herio’r dysgwyr, fel gofyn cwestiynau i asesu dealltwriaeth a rhoi cyfle iddynt wneud penderfyniadau drostynt eu hunain. Un peth pwysig dwi wedi’i ddysgu wrth astudio ym Met Caerdydd yw pa mor bwysig yw profiadau ymarferol, nid yn unig ar gyfer gallu cymhwyso gwybodaeth ddamcaniaethol ond hefyd i roi hwb i’ch hyder a rhoi profiadau i chi na fyddech chi’n eu cael yn yr ystafell ddosbarth yn unig!”

Audrey Gunn
BSc (Anrh) Chwaraeon, Addysg Gorfforol ac Iechyd

“Rwy'n mwynhau astudio Chwaraeon a Gwyddor Ymarfer Corff ym Met Caerdydd oherwydd pa mor eang yw'r cwrs ac mae'n addas ar gyfer fy nyheadau gyrfa yn y dyfodol. Seicoleg, Biomecaneg a Ffisioleg yw'r tair disgyblaeth sy'n sail i radd Chwaraeon a Gwyddor Ymarfer Corff, gan ein galluogi ni fel myfyrwyr i ddatblygu ein dealltwriaeth a gwybodaeth mewn amryw o feysydd pwnc. Gan fod gennyf ddiddordeb parhaus yn chwaraeon, mae'r cwrs hwn wedi fy ngalluogi i ehangu fy nealltwriaeth a'm hangerdd i weithio o fewn y diwydiant yn y dyfodol. Mae'r cwrs ei hun yn hynod ryngweithiol, o gynnwys ar-lein i ffurflenni adborth, mae pob darlithydd yn awyddus i ddatblygu perthynas ymddiriedus gyda phob myfyriwr, gan wneud iddo deimlo eich bod i gyd yn y radd hon gyda'ch gilydd.”

Erin Hughes
Llysgennad Myfyrwyr Gwyddor Chwaraeon ac Ymarfer Corff​