Trefnu aduniad
Oes gennych chi ddiddordeb mewn cynnal aduniad gyda'ch cyd-Gyn-fyfyrwyr? Gallwn ni helpu!
Gall y tîm Cyn-fyfyrwyr eich tywys ar sut i gynllunio eich aduniad, anfon gwahoddiadau i hen ffrindiau a hyrwyddo eich digwyddiad.
Gwahodd eich gwesteion
Mae gan ein cronfa ddata filoedd o Gyn-fyfyrwyr Met Caerdydd o ystod o grwpiau blwyddyn y gallwn drosglwyddo eich gwahoddiadau iddyn nhw*.
Neu gallwn ofyn iddyn nhw a ydyn nhw'n hapus i ni rannu eu manylion cyswllt gyda chi er mwyn i chi allu cysylltu â nhw eich hunain!
Gallwn chwilio ein cronfa ddata yn seiliedig ar:
- blwyddyn graddio
- cwrs astudio
* Sylwch mai dim ond y rheiny sydd wedi dweud eu bod yn fodlon derbyn gohebiaeth gan Met Caerdydd y gallwn gysylltu â nhw.
Cynllunio beth i'w wneud
Gallwn ni roi cyngor ar lefydd i fwyta, neu lefydd i ymweld os nad ydych chi'n gyfarwydd â Chaerdydd ac angen help i benderfynu beth i wneud yn ystod eich arhosiad.
Gallwn gysylltu â'ch adran a helpu trefnu teithiau neu ymweliadau adrannol (lle bo'n bosibl) i weld beth sydd wedi newid ers eich dyddiau prifysgol!
Dod o hyd i leoliad
Os hoffech gynnal eich aduniad ar y campws, gallwch ddarganfod eich opsiynau drwy gysylltu â'n
tîm Gwasanaethau Cynhadledd. Os oes gennych ddiddordeb mewn cynnal eich aduniad yn y bar UM, cysylltwch ag
Undeb y Myfyrwyr.
Dod o hyd i le i aros
Gall cyn-fyfyrwyr Met Caerdydd gael mynediad i ostyngiadau arbennig gan lawer o brif westai Caerdydd.
Os ydych chi'n cynllunio aduniad haf ac angen rhywle i aros, beth am ystyried eich hen lety i ychwanegu hyd yn oed mwy o hiraeth i'ch profiad?
Rhwng diwedd Mehefin a dechrau Medi, mae Met Caerdydd yn cynnig llety i deuluoedd, grwpiau a theithwyr unigol.
Neu rhowch wybod i ni am eich aduniad a gallwn ddysgu am yr argaeledd ar eich cyfer.
Hyrwyddo eich aduniad
Gallwn rannu manylion eich aduniad ar ein cyfryngau cymdeithasol ac yn ein cylchlythyrau digidol chwarterol neu e-byst misol i helpu i ddod o hyd i unrhyw un sydd â diddordeb mewn mynychu.
Helpwch ni i dyfu ein rhwydwaith cyn-fyfyrwyr
Mae'n bosibl, drwy gydol eich cynllunio aduniad, eich bod yn dod o hyd i Gyn-fyfyrwyr nad ydynt wedi ymuno â'n cymuned eto. Byddem yn gwerthfawrogi os byddech yn annog unrhyw un yn eich grŵp i ymuno fel y gallwn wneud ein cymuned yn fwy byth ac ymgysylltu â mwy o gyn-fyfyrwyr Met Caerdydd.
Rhannu eich lluniau
Ar ôl i'ch aduniad ddigwydd, byddem wrth ein boddau'n clywed am sut yr aeth a gweld unrhyw luniau o'r achlysur. Os ydych chi'n hapus i ni, gallwn wedyn rannu'r rhain gyda'r gymuned cyn-fyfyrwyr gyfan.
Cysylltu â ni
Os oes gennych ddiddordeb mewn cynllunio aduniad ac am i ni helpu gydag unrhyw un o hyn, e-bostiwch ni ar
alumni@cardiffmet.ac.uk.
