“Mae Caerdydd yn ddinas mor gynnes a hyfryd. Mae’r bobl yn braf a chroesawgar, ac mae’r ddinas mor fywiog a fforddiadwy yn enwedig fel myfyriwr.

Fy hoff beth am Gaerdydd ydy’r parciau. Mae Parc y Rhath yn berl, ac mae Parc Bute yn mynd ymlaen am oesoedd ac mae mor brydferth. Mae picnic yn gymaint o hwyl!

Mae bywyd nos Caerdydd fel myfyriwr yn uchafbwynt arall, mae cymaint i’w wneud. Bwyta allan yw fy ffefryn ac oherwydd y gymuned amrywiol yn y ddinas cewch flasu gwahanol fwydydd o bob rhan o’r byd.”

Esther Jibril
BA (Anrh) Dylunio Ffasiwn

O ran bwyd, mae gan Gaerdydd opsiynau ar gyfer pob cyllideb, o gadwyni mawr fel Nando’s, Wahaca a Bill’s, i rywbeth mwy ffansi yn Ivy Caerdydd (mae Ivy Asia ar fin agor yr haf hwn!), neu werthwyr bwyd annibynnol llai, mwy clos fel Brother Thai, Nook a Dusty Knuckle Pizza.

Mae’r ddinas a’r cymdogaethau cyfagos yn gyforiog o fwytai a siopau cludfwyd. Gall ardaloedd Treganna, Cathays a’r Rhath ddarparu ar gyfer unrhyw beth o chwant falafel i awydd dwfn am grempogau hwyaid, tra bod gan Cathays fwyty Indiaidd arobryn Mint and Mustard. Yn y cyfamser, mae’r Rhath yn gartref i gaffi 100% fegan Anna Loka. Gallwch fachu coffi wedi’i fragu’n berffaith o lawer o’r siopau coffi prysur ym Mhontcanna – Lufkin a Ground i enwi dim ond rhai!

Mae Caerdydd hefyd yn gartref i sîn bwyd stryd ffyniannus, gyda dwsinau o werthwyr annibynnol yn ymddangos mewn lleoliadau hynod fel DEPOT – warws segur 24,000 troedfedd sgwâr sydd wedi’i drawsnewid yn fecca ar gyfer cwrw crefft a chiniawa achlysurol – neu’r Bingo Lingo enwog!

Mae Bae Caerdydd hefyd yn croesawu Gŵyl Bwyd a Diod Caerdydd bob haf sy’n gweld cannoedd o gynhyrchwyr a gwerthwyr bwyd yn y Roald Dahl Plass bob blwyddyn.

“Yn fy marn i, rhaid i Gaerdydd fod y ddinas orau i fyw ynddi fel myfyriwr! Gyda phopeth y gallech fod ei eisiau o fywyd y ddinas, nid oes angen i chi hefyd deithio’n bell i ddod o hyd i heddwch a thawelwch a/neu ardal cerdded hardd. Fydda i byth yn blino ar y tirweddau prydferth na’r llwybrau cerdded o fri ar garreg fy nrws.

Hefyd, fel cefnogwr chwaraeon brwd, byddai’n esgeulus edrych dros yr awyrgylch drydanol yng nghanol y ddinas ar ddiwrnodau gemau! Cartref i athletwyr elitaidd o rygbi i bêl-droed i bêl-rwyd, ac yn y blaen, ni fyddwch byth ar golled am gynlluniau penwythnos.

Heb anghofio’r bariau, bwytai a lleoliadau adloniant niferus, mae bywyd myfyriwr yng Nghaerdydd heb ei ail. O’r bywyd nos i’r dreftadaeth ddiwylliannol gyfoethog, mae rhywbeth at ddant pawb yng Nghaerdydd mewn gwirionedd.”

Jaiden Denney
MSc Seicoleg Iechyd

Mae gan Gaerdydd dreftadaeth chwaraeon anhygoel. Gallech dreulio eich penwythnosau yma yn gwylio pêl-droed yn stadiwm Dinas Caerdydd, criced rhyngwladol yng Ngerddi Sophia, hoci iâ gyda’r Cardiff Devils ym Mae Caerdydd ac wrth gwrs, rygbi rhyngwladol yn Stadiwm Principality. Os ydych chi’n hoff o gyfranogiad torfol neu ddigwyddiadau chwaraeon anghystadleuol, mae ras 10k Caerdydd a Hanner Marathon Caerdydd yn rhedeg bob blwyddyn, gyda marathon llawn dafliad carreg i Gasnewydd.

Bywyd Nos

Mae gan Gaerdydd dipyn o enwogrwydd am ei bywyd nos ac nid yw’r bar yma yn ddim llai na chwedlonol. Mae clybwyr i’w cael yn aml wedi’u clystyru o amgylch Heol Eglwys Fair, dim ond llwybr byr o Orsaf Drenau Caerdydd Canolog, a Heol Greyfriars lle byddwch chi’n dod o hyd i nosweithiau myfyrwyr yn PRYZM. Byddai’r rhai sy’n chwilio am noson fwy soffistigedig yn gwneud yn dda i roi cynnig ar fariau a chlybiau ar Mill Lane neu’r Cocktail Quarter ar y Stryd Fawr. Yn y cyfamser, os oes gennych awch am gwrw crefft, ewch i’r tafarndai a’r bragwyr o amgylch Stryd Womanby a Stryd yr Eglwys. Mae taith i fragdy Tiny Rebel, dim ond 20 munud o’r canol yn weithgaredd gwych i’r rhai sydd am roi cynnig ar rai cwrw gwahanol!

Gweld a Gwneud

I’r rhai sy’n hoff o gerddoriaeth fyw, mae Caerdydd yn gartref i amrywiaeth o leoliadau annibynnol llai, gyda’r Motorpoint Arena a Stadiwm Principality yn gartref i fandiau ac artistiaid enwog. Mae Neuadd Dewi Sant yng nghanol y ddinas a’r Glee Club ym Mae Caerdydd yn lleoliadau gwych ar gyfer comedi byw, ac os mai ffilm yw eich peth, mae Caerdydd yn gartref i lawer o theatrau ffilm, a llond llaw o sinemâu dros dro sy’n cynnal dangosiadau mewn lleoliadau gwahanol fel Castell Caerdydd a hyd yn oed toeau ac isloriau o amgylch y ddinas. I ddilynwyr drama a cherddorol, mae Canolfan Mileniwm Cymru eiconig ym Mae Caerdydd yn lleoliad theatr a chelfyddydau byd-enwog, ac yng Nghanolfan Gelfyddydau Chapter yn Nhreganna fe welwch chi sinema, theatr gyfoes, bar a chaffi i gyd yn un.