Bwyd, Maeth ac Iechyd

Mae ein hymchwil yn gwerthuso dewisiadau bwyd sy'n gysylltiedig â dewisiadau synhwyraidd ac addasiad yn ymwneud yn benodol â bwydydd sy'n Uchel mewn Braster, Halen a Siwgr neu fwydydd sydd wedi'u prosesu'n helaeth. Mae'r ymchwil yn archwilio sawl maes allweddol, gan gynnwys fformiwleiddiad cynhyrchion, maint dognau a marchnata bwydydd sy'n Uchel mewn Braster, Halen a Siwgr, a'r effeithiau y mae ffactorau megis oedran, rhywedd a lefelau gweithgarwch corfforol yn eu cael ar ddewis bwyd. Ein ffocws drwy'r Ganolfan Diwydiant Bwyd yw cynorthwyo gwneuthurwyr bwyd i ail-fformiwleiddio cynhyrchion er mwyn annog newidiadau cadarnhaol mewn ymddygiadau i wella iechyd. Yn ogystal, rydym yn darparu cyngor ymarferol i ddefnyddwyr a'r tîm Iechyd y Cyhoedd i sicrhau bod 'newidiadau iachus yn newidiadau hawdd'.

Gyda'n gweledigaeth ar gyfer y dyfodol, ein nod yw sicrhau bod newidiadau iachus hefyd yn newidiadau cynaliadwy o ran y faich ar yr amgylchedd, gan sicrhau cyflenwad bwyd maethlon, diogel a chynaliadwy ar gyfer cenedlaethau'r dyfodol.

Prosiectau:

• Gwerthuso dewisiadau bwyd sy'n ymwneud â dewisiadau synhwyraidd ac addasiad sy'n benodol gysylltiedig â bwydydd sy'n Uchel mewn Braster, Halen a Siwgr neu fwydydd sydd wedi'u prosesu'n helaeth.

Tîm amlddisgyblaethol yw'r grŵp ymchwil Bwydydd Bioactif ac Ergogenig sy'n rhan o ymchwil parhaus i echdynnu, nodweddion cemegol, cyfoethogi a diogelu cyfansoddion bioactif (deunyddiau maethol-fferyllol) sydd wedi'u cynnwys mewn systemau bwyd o blanhigion, anifeiliaid (cynhyrchion llaeth) a bwydydd wedi'u meithrin. Mae deall gweithrediad biolegol y cyfansoddion hyn yn rhan hanfodol o'r ymchwil, ac felly mae'r grŵp yn archwilio bioactifrwydd y cyfansoddion hyn in vitro gan ddefnyddio technegau meithrin celloedd. Mae gennym hefyd y capasiti i gynnal treialon â phobl gyda chynhyrchion sy'n dod o fwydydd, a phennu paramedrau metabolaidd megis ymwrthiant inswlin, glwcos a cholestrol.

Drwy gydweithio gyda'r diwydiant, rydym hefyd yn archwilio cyfleoedd i fasnacheiddio ein canfyddiadau ymchwil, gyda'r nod o gael eiddo deallusol a datblygu bwydydd gweithredol newydd y gellir eu defnyddio i wella iechyd, llesiant a pherfformiad mewn chwaraeon.

Mae prosiectau'n cynnwys

• Effaith echdyniadau planhigion bioactif yn y broses o wella clwyfau gan ddefnyddio model celloedd meinwe dynol.

• Ymchwilio i ddeunyddiau maethol-fferyllol gwrth-ddiabetig mewn gwahanol echdyniadau planhigion e.e. te, hadau a ffrwythau penodol

• Pennu beth yw potensial gwrthocsidol a gwrthlidiol gwahanol echdyniadau o blanhigion.