Yn ystod y flwyddyn gyntaf o astudio byddwch yn ymgymryd â chwe modiwl gorfodol. Trwy gydol y modiwlau hyn byddwch yn archwilio cysyniadau allweddol ym maes dadansoddi perfformiad chwaraeon, cyn symud ymlaen i ddefnyddio a chymhwyso technolegau dadansoddi masnachol. Byddwch hefyd yn ymgymryd â modiwlau i hwyluso'ch cyfnod pontio i astudio ar lefel prifysgol, ymchwilio i ddamcaniaethau ym maes Chwaraeon ac Ymarfer Corff, yn ogystal â chael cyfleoedd i ennill hyfforddiant galwedigaethol cydnabyddedig a chymwysterau proffesiynol sy’n berthnasol i’r diwydiant.

Mae’r ail flwyddyn yn adeiladu ar y flwyddyn gyntaf gyda modiwlau dadansoddi derfformiad chwaraeon yn eich helpu i ymchwilio ymhellach i ddamcaniaethau dadansoddol ac adborth o fewn dadansoddi, hyfforddi a dysgu athletwyr, tra hefyd yn cael mwy o ffocws ar ddefnyddio'r wybodaeth mewn lleoliad cymhwysol. Yn faes galwedigaethol, cewch gyfleoedd i ddatblygu eich hunaniaeth broffesiynol gynnar ym maes dadansoddi perfformiad chwaraeon drwy ddysgu sy'n gysylltiedig â gwaith (e.e. darlithoedd gan arbenigwyr/gwestai) a dysgu’n seiliedig ar waith (e.e. lleoliadau). Fel maes allweddol, mae dysgu’n seiliedig ar waith wedi'i gynllunio er mwyn eich galluogi i gymhwyso eich gwybodaeth o'r rhaglen mewn sefyllfa go iawn a chael profiadau gwerth chweil fel sylfaen ar gyfer gwaith yn y dyfodol

Mae'r flwyddyn olaf o astudio’n rhoi cyfle i chi archwilio meysydd cyfoes sy'n gysylltiedig â'r maes dadansoddi perfformiad chwaraeon. Byddwch yn archwilio a chymhwyso sgiliau datrys problemau i feysydd damcaniaethol cysylltiedig yn ogystal ag ymgymryd â thasgau dadansoddi cymhwysol sy'n gysylltiedig â rôl dadansoddwr perfformiad mewn chwaraeon perfformiad uchel. Mae'r flwyddyn olaf yn canolbwyntio ar eich datblygu chi fel dysgwr annibynnol, ysgogol a all reoli eich dysgu a sicrhau bod hyn yn cyd-fynd â'ch cam cyntaf i gyflogaeth raddedig neu astudiaethau pellach.

Mae dulliau dysgu, addysgu ac asesu effeithiol yn sail nodau addysgol a deilliannau dysgu pob un o'n rhaglenni a'n modiwlau. Gall dulliau dysgu ac addysgu gynnwys darlithoedd, seminarau, gweithdai, tiwtorialau a sesiynau ymarferol. Mae ein Amgylchedd Dysgu Rhithwir hefyd yn elfen annatod o'r pecyn dysgu sy'n cefnogi anghenion ein myfyrwyr.

Mae darlithoedd arweiniol yn cyflwyno pynciau a chysyniadau allweddol, tra bod seminarau, tiwtorialau, gweithdai a sesiynau ymarferol yn canolbwyntio ar gymhwyso cysyniadau allweddol gyda'r nod o wella profiad ac ymgysylltiad myfyrwyr. Byddwch hefyd yn cwrdd â thiwtoriaid ar sail un i un. Fel ysgol, rydym yn gweithio'n galed i ddarparu cyfleoedd dysgu myfyriwr-ganolog, sy'n darparu amgylchedd dysgu hyblyg o ansawdd uchel.

Mae dulliau dysgu ac addysgu yn pwysleisio ac yn hwyluso datblygiad eich rhesymu beirniadol, ac yn annog integreiddio ymarfer a theori. Drwy gydol eich rhaglen, byddwch yn cael profiad o ddysgu a arweinir gan diwtor a dulliau dysgu hunangyfeiriedig, gan gynyddu annibyniaeth a myfyrio a'ch annog i ddatblygu agwedd gadarnhaol tuag at ddysgu gydol oes.

Mae ein dulliau addysgu a dysgu yn ymgorffori 'EDGE' Met Caerdydd (Sgiliau Moesegol, Byd-Eang, Digidol & Entrepreneuraidd) a byddwch mewn sefyllfad da i ddangos priodoleddau graddedig y disgwylir i chi eu cael mewn byd gwaith sy'n mynd yn fwyfwy cystadleuol. Ein nod yw eich helpu i ddatblygu'n weithwyr proffesiynol myfyriol ac yn ysgolheigion beirniadol. Yn eich rhaglen chwaraeon ym Met Caerdydd, byddwch yn cael profiad dysgu o'r cyfnod sefydlu i raddio sy'n gydlynus ac sy'n datblygu eich hunaniaeth o fewn eich rhaglen astudio.

Mae nodweddion penodol o brofiad dysgu ar Ddadansoddiad Perfformiad Chwaraeon yn cynnwys:

• Ymchwilwyr ac Ymarferwyr byd-enwog sy'n rhan annatod o'r pecyn dysgu a gynigir i'n myfyrwyr.
• Cyfleusterau Dadansoddi perfformiad chwaraeon penodol o safon fyd-eang i wella profiad dysgu myfyrwyr.
• Mae'n cael ei gydnabod yn eang fel un o raglenni Dadansoddi Perfformiad Chwaraeon blaenllaw yn DU, gyda model dysgu’n seiliedig ar waith ar gampws unigryw wedi'i gefnogi gan staff arbenigol.

Mae'r strategaethau asesu ar gyfer pob modiwl yn amrywio i sicrhau bod y dull mwyaf priodol yn cael ei weithredu ar gyfer eich maes astudio. Cynlluniwyd y dulliau asesu er mwyn gwella eich profiad dysgu ac er mwyn cydnabod eich bod wedi cyflawni'r canlyniadau dysgu sy'n gysylltiedig â phob modiwl. Mae asesu hefyd yn sicrhau eich bod wedi cyflawni'r safon sy'n ofynnol i symud ymlaen i'r cam nesaf neu i fod yn gymwys ar gyfer dyfarniad (fel y nodwyd gan y FHEQ a FFCCHC). Mae asesiadau'n ategu eich profiad dysgu drwy roi cyfleoedd i chi gymryd rhan mewn asesiadau ffurfiannol a chrynodol i brofi eich gwybodaeth, eich gallu, eich sgiliau a'ch dealltwriaeth feirniadol. Asesir y modiwlau israddedig drwy gyfuniad o fathau o asesiadau. Er enghraifft:

• gwaith cwrs ysgrifenedig
• cyflwyniadau poster
• cyflwyniadau llafar
• portffolios
• arholiadau wedi’u gweld a heb eu gweld
• sgiliau ymarferol
• gweithgareddau eraill sydd wedi'u cynllunio er mwyn asesu, datblygu a gwella sgiliau academaidd a chyflogadwyedd.

Bydd disgwyl i chi gwblhau prosiect terfynol fel rhan o'r asesiad o'ch gradd anrhydedd. Mae prosiectau terfynol yn ddarnau pwysig o waith a all fod yn brosiect ymchwil, arloesedd, ymgynghoriaeth neu gymunedol.​

Mae EDGE Met Caerdydd yn eich cynorthwyo i ffynnu yn y byd modern. Drwy gydol eich gradd byddwch yn profi ystod o gyfleoedd i ddatblygu eich cymwyseddau moesegol, digidol, byd-eang ac entrepreneuraidd drwy ddysgu sy'n seiliedig ar broblemau, astudiaethau achos diwydiant y byd go iawn, profiadau gwaith integredig ar y campws a cyfleoedd ar gyfer lleoliadau dysgu’n seiliedig ar waith oddi ar y campws. Byddwn yn sicrhau eich bod yn cael ystod o gyfleoedd i ddatblygu sgiliau trosglwyddadwy megis cyfathrebu, gwaith tîm ac arweinyddiaeth./p>

Yn ystod eich blwyddyn gyntaf o astudio byddwch yn cael y cyfle i ymgymryd â chymwysterau technegol mewn amrywiaeth o feysydd diwydiant perthnasol gan gynnwys hyfforddi chwaraeon, ymarfer corff & iechyd a diogelwch. Bydd y cyfleoedd hyn yn sicrhau bod gennych y cymwysterau a'r profiad priodol i wneud cais am un o'r llu o gyfleoedd lleoliadau gwaith a gynigir ar y campws ac oddi arno. Byddwn hefyd yn eich cefnogi i chwilio am gyfleoedd i weithio neu astudio dramor. Gall lleoliadau gwaith roi mantais hollbwysig i chi o ran cael gwaith proffesiynol ar ôl graddio. Mae myfyrwyr sydd wedi graddio gyda BSc Dadansoddi Perfformiad Chwaraeon wedi mynd ymlaen i weithio mewn gyrfaoedd o fewn y Diwydiant Chwaraeon a thu hwnt.

Mae diwylliant beunyddiol y ddarpariaeth dadansoddi perfformiad, ynghyd â phrofiadau galwedigaethol perthnasol, yn creu amgylchedd sy'n ategu'r dysgu a datblygiad proffesiynol. Amlygir hyn gan lwyddiant recriwtio graddedigion gan glybiau mawr a thimau rhyngwladol mewn amryw o chwaraeon. Mae graddedigion diweddar y BSc Dadansoddi Perfformiad Chwaraeon bellach yn gweithio i’r English Institute of Sport, Chwaraeon Cymru, Undeb Rygbi Cymru, Rygbi'r Scarlets, Undeb Rygbi'r Alban, Bath RFC, Clwb Pêl-droed Southampton, Clwb Pêl-droed Dinas Abertawe, Clwb Pêl-droed Briste a thu hwnt, fel y New South Wales Institute of Sport yn Awstralia. Mae myfyrwyr eraill wedi parhau i astudio ymhellach ar lefel meistr a doethuriaeth.

Dylai fod gan ymgeiswyr bum gradd TGAU gan gynnwys Iaith Saesneg (neu Iaith Gyntaf Gymraeg) a gradd C neu'n uwch mewn Mathemateg* (gradd 4 neu'n uwch ar gyfer ymgeiswyr sydd â TGAU newydd eu diwygio yn Lloegr) ynghyd â 120 - 128 o bwyntiau o 3 Safon Uwch (neu gyfwerth). Gall cynigion nodweddiadol gynnwys:

• Safon Uwch: 120 - 128 o bwyntiau i gynnwys graddau BB. Bydd Bagloriaeth Cymru - Tystysgrif Her Sgiliau Uwch yn cael ei hystyried yn drydydd pwnc
• Diploma Estynedig Cenedlaethol RQF BTEC / Diploma Estynedig Technegol Caergrawnt DMM mewn pwnc perthnasol
• Diploma Estynedig VTCT mewn Astudiaethau Chwaraeon gradd DDM yn gyffredinol
• Irish Leaving Certificate: 120 - 128 pwynt o Lefel Uwch i gynnwys graddau 3 x H2 (y radd i
• saf a ystyrir yw H4)
• Advanced Highers yr Alban: 120 - 128 pwynt i gynnwyd graddau CC
• Diploma Mynediad i Addysg Uwch: Pasio gyda 15 credyd gyda rhagoriaeth a 30 credyd gyda Theilyngdod
• Yn ddelfrydol, dylai fod gan ymgeiswyr broffil chwaraeon cryf

*Ar gyfer ymgeiswyr o Gymru sy'n sefyll y TGAU Mathemateg diwygiedig, byddwn yn derbyn naill ai TGAU Mathemateg neu Mathemateg - Rhifedd.

Fel arfer, gwneir cynnig i ymgeiswyr yn seiliedig ar y manylion uchod. Bydd cynigion nodweddiadol yn cael eu gwneud o fewn yr ystod tariff a nodir uchod a byddant yn seiliedig ar gryfder eich cais cyffredinol, gan gynnwys eich proffil academaidd a chwaraeon. Ar gyfer ymgeiswyr sydd yn ymgymryd â 2 Safon Uwch (neu gyfwerth) yn unig neu sydd ddim yn rhagweld eu bod am gyrraedd y tariff safonol, caiff ceisiadau eu hystyried ar sail y proffil academaidd cyfan ac efallai y byddwn yn gwneud cynnig wedi'i raddio yn lle cynnig gan ddefnyddio Tariff UCAS.

Os ydych yn astudio cyfuniadau o'r uchod neu os nad yw'ch cymhwyster wedi'i restru, cysylltwch â Derbyniadau neu edrychwch ar dudalen Chwilio am Gwrs UCAS am y gofynion mynediad. Gellir dod o hyd i ragor o wybodaeth am ein gofynion mynediad, gan gynnwys cymwysterau o'r UE trwy glicio yma.