Mae Prifysgol Metropolitan Caerdydd wedi derbyn y teitl mawreddog Prifysgol y Flwyddyn 2021 gan y Times Higher Education. Mae hyn yn dilyn nifer o lwyddiannau, gan gynnwys cael ein henwi’n Brifysgol y Flwyddyn yng Nghymru gan The Times a The Sunday Times Good University Guide 2021; yr ail gynnydd mwyaf yn y DU yn The Complete University Guide 2022; a chynnydd mwyaf erioed y sefydliad yn The Times a The Sunday Times Good University Guide 2021.

Roedd Met Caerdydd yn y safle uchaf o blith yr holl sefydliadau ôl-1992 yn y Fframwaith Rhagoriaeth Ymchwil diwethaf. Roedd ansawdd y cyfraniad a wnaed gan Met Caerdydd yn sylweddol, gyda chwarter o’r holl ymchwil yn cael ei nodi i fod yn ‘arwain y byd’ ac ymchwil 4* wedi’i nodi ym mhob uned asesu, gan amlygu effaith sylweddol Met Caerdydd ar yr economi, y gymdeithas, diwylliant a pholisi cyhoeddus ehangach./p>

Mae ein Hacademïau Byd-eang yn creu ac adeiladu ar ein llwyddiannau, gan ddwyn ein harbenigedd ymchwil ynghyd i ddatblygu dulliau rhyngddisgyblaethol, rhyngwladol ac effeithiol i rai o’r heriau mwyaf hirsefydlog sy’n effeithio arnom yn lleol, yn genedlaethol ac yn rhyngwladol. Trwy ddwyn ein cryfderau ym meysydd addysg, ymchwil ac arloesi ynghyd, ein nod yw helpu i wella’r byd o’n cwmpas mewn modd cydweithredol a thosturiol.