Mae’r cyn-fyfyriwr Jack Leach yn disgleirio ym muddugoliaeth Lloegr dros Bacistan tra bod un arall yn creu hanes i Surrey

​Disgleiriodd cyn-fyfyriwr Met Caerdydd Jack Leach dros y penwythnos, gan chwarae rhan ganolog ym muddugoliaeth hanesyddol Lloegr dros Bacistan. Sicrhaodd Lloegr fuddugoliaeth wefreiddiol yn y Prawf cyntaf ym Multan, gyda Leach, troellwr braich chwith, yn cipio’r tair wiced olaf ar y pumed bore, gan selio un o fuddugoliaethau mwyaf rhyfeddol oes y ‘Bazball’.

Mae cyn cyd-chwaraewr Leach ym Met Caerdydd, Rory Burns, hefyd wedi creu hanes yn ddiweddar fel y capten Surrey cyntaf i ennill tri theitl pencampwriaeth yn olynol.​

Mae wedi bod yn ychydig fisoedd hynod lwyddiannus i chwaraewyr criced presennol a chyn-chwaraewyr sy’n gysylltiedig â Met Caerdydd. Yn ddiweddar, enillodd criced Morgannwg eu hail Gwpan Un Diwrnod Banc Metro mewn pedair blynedd, gyda chyfraniad nodedig gan 9 o dalent criced Met Caerdydd ac UCCE, gan arddangos rhaglen UCCE (Canolfannau Rhagoriaeth Criced y Brifysgol) y Brifysgol.

Dywedodd Prif Hyfforddwr Criced presennol a Rheolwr Datblygu G​weithlu Met Caerdydd, Gethin Smart​, “Rwy’n hynod falch o’r rôl y mae Criced Met Caerdydd yn parhau i’w chwarae wrth ddatblygu myfyrwyr-athletwyr yn gricedwyr proffesiynol. Yn ystod y 3 thymor diwethaf, rydym wedi gweld 6 o raddedigion yn symud i mewn i’r gêm broffesiynol, heb anghofio Lauren Filer a Nat Wraith o adran y Merched hefyd.”

Gan adlewyrchu ar ddatblygiad Leach, dywedodd cyn-hyfforddwr Criced Met Caerdydd (UWIC ar y pryd) Kevin Lyons, a fu’n ei hyfforddi ef a Rory am dair blynedd: “Mae Jack wedi gwella bob blwyddyn. Roedd bob amser yn gydwybodol, a does dim syndod i mi ei fod wedi gwneud yn dda. Roedd angen y cyfle arno, ac mae wedi dangos cymeriad gwych dros y blynyddoedd."